Von gotz gnaden wy Otto grave to Holstein, Schowenborgh unnd thom Sterneberge, herre tho Ghemen, domprobst to Hildensem etc., bekennen unnd betugen opentlich in und mit disserm unserm breve vor uns, unse nhakomen und alßweme, dat wy belehnet hebben unnd belehnen jegenwordigen in crafft disses breiffs tho einem rechten erflichen manlehene den ersamen Tylen Brandes, borger tho Hildensem, alse denn eldesten mit der vogedie uppem Eselstige von der Nigenstadt dorhe an, dar Goddert Crudeman wonett, de strathe entlanck umbe denn orth wenth an sunt Ciriacus doher unnd vorth van sunthe Ciriacus wenthe an des Hilligen Crutz dorhe, mit drittig nigen schillingen Hildeßmescher und mit drenn Hildeßmescher nigen penningen in den sulven woninghenn erfftinsses, und mit twen hove landes im Wakensteder velde belegen, unnd mit dren hove landes und einen hoff to Dinkelvede belegen, mit allen tobehoringen und rechtigheiden inn dorppe, in velde, in watter, in weide, in wissche und in holthe, nichtz uthbeschedenn, alse zaliger doctor Johan Brandes synn vedder de sulvige gudere van uns und der domprobstie tho Hildenssem halffer tho lehene gedragen hefft, willen ock omhe disses lehens unnd gudes synn bekennige here unnd warhe wesenn, wur, wanne unnd wo vacken ohm des noith unnd behoiff is und dat van uns geesschett werth. Des tho bekantnisse hebbe wy unse rechte ingesegell witlichen an dussenn breiff doenn hangen, de gegeven nach Christi unsers heren geborth Viffteienhundert und im seßundedrittigste jare, mandags nach Letare hierusalem.