Ich Bartolt Broestede, Burger zu Braunschweich, bekenne und thue hiemit kundt mit von wegenn meiner Bruder, alß mich der erwirdiger und wolgeborner Her, Her Wilhelm Graff zu Holstein, Schaumburch und Sternebergh, Her zu Gemen, Thumbprobst zu Hildeßheim etc., mit etzlichen Irher G[naden] Thumbprobstei Lehengutern belehnet, das der Inhalt des Lehenbrieffs gelautet wie hernach folgt: Wyr Wilhelm von Gots Gnaden Graf zu Holstain, Schaumborch und Sternebergh, Her zu Gemen, Thumbprobst zu Hildeßheim etc. bekennen in diesem unserm offenen Brieve vor unß und unser in der Thumbprobstei zu Hildeßheim Nachkummen, das wir belehenet haben und belehnen jegenwertigen in Kraft dieses Brieves den achtbarn unsern lieben getreuen Bartolt Broestede sampt seine Gebruder, Burger zu Braunschweich, zu einem rechten Manerflehne viff Ferndel Landes uff dem Broesteder Velde belegen mit alle ihren Rechticheiten und Zubehorungen in Dorfe, Velde, Holtze, Grase, Wissche und Weide, so Hanß Broestede seliger diese Guter vor von der Thumbprobstei zu Hildeßheim zu Lehne gehat, und wollen dysses vorgeschrieven Lehens und Guter sein bekennige Her und Warendt wesenn und ihne entheven von allen dermaissen Ansprache, wor und wannehr ihne des Noit und Behoiff ist und das von uns geesschet wirdt, und haben des zu Urkundt und Bekantnusse unsern angebornen Ingesiegel beneden an diesen Brieff lassen hangen, der gegeben ist nach Christi unsers Hern und Selichmachers Geboirt im Funfzehenhundert neunundfunftzigsten Jair, den achtundzwantzigsten des Monats Augusti. Das ich demnach sollich Lehen obgemeltermassen empfangen, Ihren G. alß Thumbprobsten in die Handt gelobt und geschworen, Ihren G. und dero in der Thumbprobstei Nachkummen der Guter halben trewe und holdt zu sein, Bestes zu furdern und Arges zu verwarnen, die Lehenguter ohn Ihr G., derselben Nachkummen Wissen und Verwilligungh nicht zu vereussern oder zu verpfenden und sunsten alles das zu thun, was ein treuer Lehenman seinem Lehenhern zu thunde pflichtigh ist, des hab ich zu Urkundt der Warheit diß mit meinem Siegel vor mich und meine Bruder undersiegeltt, geben im Tage und Jair wie in meins G. H. Brieff obenbemelt geschrieben steit.