Van godes gnadenn wy Henningk bisschop tho Hildensem bekennen openbar in dussem breve vor uns und unse nakomen, datt wy hebbt belentt und belenenn mydt hande und mydt munde so als lensrecht ist unsen leven getruwen Johan van Jeynsen und syne manervenn mydt sodannen guderen, alse die ergenante Johan und syne forfaren van uns und unsem stiffte tho lene gehatt hebbenn, by namen mydt einem borchleynhoffe in Eldagessen, dartho mydt veer hove landes, eyner schepperye und allerley feydryfften tho Eldagessenn, mydt veer hove landes tho Harboldessenn, twe hove landes tho Dyrssen, eyner hove landes tho Quyckbornn und teyn morgen landes up dem Rossenhope mydtt der lutken marsck und Dyrsser wisck mydt allen ohren thobehorungen, nychts darvan uthgesundertt, und wy und unse nakomen schullen und wyllen dem ergenanten Johanne van Jeynsen dusses lens rechte bekennyge here und waren wesen, wan und wor ohme des nott und behoff isz und datt van uns esschett, und hebben tho bekantenusse unse ingesegell wytlycken benede ahn dussen breff hetten hengen, na Cristi unses herrn gebortt Verteynhundertt im viffundseventigesten jar, am mydtwecken na sunte Bonifacii.