Wy Bartold van gods gnaden bisschup to Hildensem unde administrator der kercken to Verden bekennen openbare in dussem breve vore uns unde unse nakomen bisschuppe to Hildensem, dat wy belehnt hebben mit hande unde munde alse lehnsrecht is unde belehnen in unde mit dussem breve to eynem rechten ervenmanlehne den ersamen Hans Brandes, unsen borgeren to Hildensem, mit verdehalvere hove landes vore unser stad Hildensem uppem Oldendorper velde belegen, mit dem halven tegeden to Emmercke, mit der Klickmolen twisschen Hase unde Vorste unde noch mit eyner hove landes uppe dem Oldendorper velde mit aller slacht nuth unde tobehoringe in holte, in velde, in water, in wischen unde in weyde, wu me de benomen mach, nichtes uthbescheden, alse Hans Brandes, des genanten Hanses vadere, dat sulve gud vore van uns unde unsem stichte to Hildensem to lehne gehat hefft, unde wy willen unde schullen ome dusser vorgescreven guder sin rechte bekennige here unde waren wesen, wure unde wan ome des noith unde behoff is unde dat van uns geesschet wert. Des to bekantnisse hebben wy unse ingesegell an dussen breff witligen heten hengen nach Christi unses heren gebort im Veirteynhundersten unde tweundeachtentigesten jare, am sondage Estomichi.