Wy Bartold van gods gnaden bisschupp to Hildensem unde administrator der kercken to Verden bekennen openbar in dussem breve vor uns, unse nakomen, bisschuppe to Hildensem, unde vor alszweme, dat wy Borcharde unde Corde van Steinberge gebrodere, unse leven getruwen, umme mannichvaldigen truwen denstes willen, den se uns unde unsem stichte gedan hebben unde in tokomende tyden don mogen, begnadet unde eyn gedinge gegeven hebben, begnaden se unde gheven one eyn gedinge an alle den guderen, alse Hinrick unde Hinrick gevedderen van Steinberge, zaligen Hinricks unde Didericks sone, van uns unde unsem stichte to Hildensem to lehne hebben unde van rechte hebben schullen, nemptliken mit der borch tome Wispenstine, mit dem tegeden to Vorste by Alvelde, mit achteundetwintich hove landes, veir hove landes, viff meygerhoven unde twolff worden darsulves, dat dorpp Harbarnsen mit aller tobehoringe, den tegeden to Nettze, achte hove, dre hove unde achte worde darsulves, achte hove, theyn worde unde eyne visscherie to Lutken Vreden, elven worde in dem Oldendorppe vor Alvelde, theyn schillingh alle jar in der Leynemolen to Alvelde, twey hove unde eynen hoff to Ymmensen geheten de Kiffhove, den tegeden to Groten Wardessen, veir hove unde twey worde to Adenstidde ime richte to Wintzenborg, den tegeden to Diderickholtensen, eyne hove to Hosecksen by Alvelde, den tegeden to Dedensen unde den rottegeden an dem Hasselhauwe, an dem Hunberge, an dem Rodenkampe unde an dem Molenberge, veir hove landes to Gerdessen unde de lehnwar des kercklens darsulves, den tegeden to Lutken Wardessem, dat gud to Langenholtensen by Alvelde, driddehalve hove landes mit twen hoven tegetfrig to Groten Wardessen, unde to Lutken Wardessen eyne hove landes an dem Hasselhauwe, den lutken Danhoff, den lutken Nerenkamp, dre hove to Groten Wardessen, driddehalve hove landes vor Alvelde unde dre worde, de Michaeles Drosten unde Alheyde van Holthusen gewest hadden, unde alle dusser vorgescreven gudere rechticheyt, nut unde tobehoringe, wu men de benomen unde sick der gebruken mach, in aller mathe, alse de genanten Hinrick unde Hinrick van Steinberge de guder van uns to lehne dragen, unde wan de benomden Hinrick unde Hinrick van Steinberge sunder manszerven van dodes wegen vorfallen - dat god schicke na sinem willen - so willen unde schullen wy effte unse nakomen de benomden Borcharde unde Corde van Steinberge, wan se dat an uns synnen, mit dem vorgescreven gude to rechtem erffliken manlehne belenen, des ore here unde waren wesen unde an demsulven gude forder nemande nichtes vorscriven, bewillen edder vorseggelen, unde weret, dat yo geschege, wudannewisz dat to queme, dat schall doch unbindende unde machtlosz sin. Duth reden unde loven wy den genanten Borcharde unde Corde van Steinberge unde oren erven vor uns unde unse nakomen stede unde vast woll to holdende sunder jennigerleye list, insage effte geverde, unde hebben des to bekantnisse unse ingesegel witliken an dussen breff heten hengen na Cristi unses heren gebort Veirteynhundert darna ime sevenundeachtentigesten jare, ame avende Purificacionis Marie virginis.