Wy Bartoldt van gots gnaden bisscop to Hildensem unde administrator des stiffts to Verden bekennen openbare in dessem breve vor uns unde unse nakomen, bisscoppe to Hildensem, dat wy belehnet hebben mit hande unde mit munde alse lehnesrecht is unde belehnen jegenwordigen in crafft desses breves to eynem rechten erffligen manlehne den ersamen Hanse Brandes, borger unser stadt Hildensem, mit anderhalve hove landes unde dren kothoven im dorpe unde up dem velde to Hogenhamelen belegen mit aller tobehoringe, nut unde rechticheit in dorpe, velde, watere, wisschen unde weyden, wo men de benomen unde sick der gebruken mach, nichts darvan uthbescheiden, in aller mathe, alse Frederick Redeman de eldere, Cordt, Tile unde Frederick, Henninges zeliger sohne, broder unde vedderen de Redemenne, sodane gudt van uns unde unsem stiffte to Hildensem to lehne gehat unde uns ann unse hande gelaten unde na lehnesrechte by twen unsen belehnden mannen alse Werner Winkelmanne unde Hermen van Huddessem upgesant unde upgebracht hebben. Ok hebben wy Hanse Brandes vorbenomd umme syner bede willen vorlovet unde vorgont, dat he syne eliken husfruwen mit dessen vorbenomden guderen mach belifftuchtigen, unde wy belifftuchtigen se hyrmede jegenwordigen in crafft desses breves, unde wy willen unde schullen dem gedachten Hanse Brandes sodanes gudes unde lehnes eynem erffligen manlehne unde syner eliken husfruwen der lifftucht rechte bekennighe here unde waren wesen, wor unde wan on des not unde behuff is unde dat van uns geesschet wert ane geverde, unde hebben des to bekantenisse unnse ingesegell witligen don hangen ann dessen breff na Christi unses hern gebort Dusent viffhundert, am mitweken na dem sondage Letare in der hilligen Vasten.