Wy Bertolt vonn godtz gnadenn bisscoph tho Hildensem unnd administrator der kercken tho Verden bekennen openbar in dussem breve vor uns unnd unse nakomen, bisscophe tho Hildensem, dat wy hebben belehnet unde belehnen jegenwordigen in crafft dusses breves to eynem rechten ervenmanlehne Ludolffe vonn Oldershusen alse denn eldesten, under om Hanse synen broder unde Bertoldes von Oldershusen sone sine vedderen myth dem kercklehne to Ellensen, dritteyn kothoven, den Sundern, den Dorenhagen myth aller tobehoringhe, den halven tegeden to Echte, elven kothove unnd eyne scheperie darsulvest, myth vere hove landes to Gladebeke, den tegeden to Mackenhusen, mit dem schultetenampte in der graveschoph to Dasselle, dem tegeden to Wetzede, dem tegeden to Merckeshusen, dem schultetenampte to Silligessen, myth dem tegeden to Dudingerode, Oldenrode unnd Negenborn, und myth eyner hove landes unnd twen kothoven to Ruden, myth twelff kothoven to Kalvelde unnd myth dren hove landes unde eynem sedelhove to Lindaw unde allen anderen gudern, de se von uns unde unsem stichte to Hildensem von rechtes wegen to lehne gehadt hebben, myth allen oren tobehoringen in holte, velden, wateren, wisken unnd weiden, wu men de bnomen mach unnd seck der bruken mogen, darvon nichtes uthbescheiden, unnd wy schullen unde willen den vorgenanten von Oldershusen dusser guder unde lehnwere ore rechte here unde were wesen, wor unnd wan on des noit unnd behoiff is unnd dat van uns geeschet wart, unnd hebben des to bkantnisse unse ingesegel an dussen breff witliken heten hengen, de ghegeven is nha godes borth im Veiffteynhundersten jare, am sonnavende vor Nativitatis Marie virginis.