Wy Johann van gots gnaden bestedigede her des stiffts to Hildensem, hertoge to Sassen, Engern unde Westvalenn, bekennen openbar in dessem breve vor uns unde unse nakomen, bisscuppe to Hildensem, dat wy belehnet hebben myt hande unde munde unde belehnen jegenwordigen in crafft desses breves to eynem rechten ervemanlehne den ersamen Hanse Brandes, borger to Hildensem, alse den eldesten mit verdehalffe hove landes vor unser stat Hildensem up dem Oldendorper velde belegen, mit dem halven tegeden to Emmercke, mit der Klickmolen twisschen Hase unde Vorste, myt eyner hove landes ok belegen up dem Oldendorper velde vor Hildensem, mit eyner hove landes unde eynem hove im dorpe unde uppm velde to Bavenstede belegen, mit achtein Hildensemschen penningen an dem fronentinse, myt eyner hove landes unde eynem hove im dorpe unde up dem velde to Schellerten belegen, unde mit dem Piperkampe vor Peyne unde fort mit alle desser vorbenomden guder tobehoringe unde rechticheiden in holte, velde, dorpe, water, wisschen unde weyden, wo men de benomen unde sick der gebruken mach, nichts uthbescheiden, in aller mathe, so he de guder van unsem vorfaren unde stiffte to Hildensem to lehne gehat hefft, unde willen der guder unde lehnes sin rechte bekennige her unde ware wesen, wor unde wan om des not unde behuff is unde van uns geesschet wert ane geverde, unde hebben des to bekantenisse unse ingesegell witliken don hangen an dessen breff am jare Veffteinhundert unde ver, des mandages na Egidii confessoris.