Universis et singulis presentes nostras literas sive presens publicum instrumentum inspecturis, lecturis seu legi audituris Henninghus Molitoris, curie Hildesemensis officialis generalis, iudex ordinarius salutem in domino et presentibus fidem indubiam adhibere. Noveritis, quod in nostra ac notarii publici testiumque infrascriptorum ad hoc specialiter vocatorum et rogatorum presentia personaliter constitutis honestis Henningk Meverdes, laico Hildesemensis diocesis, ex una et Alheydt Rodenbergis, eiusdem Henningk Meverdes uxore legitima, presentibus ex altera, gravibus cum querelis proponentibus, quod licet ipsi sint matrimonialiter copulati, copula tamen carnali minime subsequenta propter certas recentes inimicicias et controversias hincinde inter eorum amicos subortas et imposterum suboriri posse aliasque causas gravissimas nimium eorum movendas, quarum pretextu insimul commorari et cohabitare non possent neque valerent et propterea separatim vivere, alter ab altera et quilibet eorum per se et in solidum ac suis propriis bonis questis et querendis libere uti et gaudere ipsis et eorum cuilibet utilius et expeditius esse visum est. In finem igitur et effectum huiusmodi supradicti coniuges, tam Henningk maritus quam Alheidt eius uxor, non coacti aut circumventi nec per errorem aliquem seducti, sed libere et spontaneis eorum voluntatibus omnibus melioribus modo, via, jure, causa et forma quibus melius et validius potuerunt et debuerunt pro se et vice ac nomine omnium heredum suorum et successorum respective convenerunt, tractarunt et in hunc qui sequitur modo concordarunt, videlicet, quod prefatus Henningk Meverdes maritus et Alheit uxor, coniuges, volunt et debent a cohabitatione mutua ac omnibus et singulis bonis mobilibus et immobilibus quomodolibet acquisitis et acquirendis esse separati et divisi, ita, quod uterque eorum per se libere et honeste vivere ac suis propriis bonis questis et acquirendis separatim et in solidum uti et gaudere realiter etiam et cum effectu ac de eisdem testari, donare, legare et ad vota sua sine contradictione et impedimento alterius disponere et ordinare possit, huiusmodi si alterum eorum decedere contigerit, alter superstites seu heredes superstitis non debent in bonis defuncti succedere, jure vel consuetudine non obstante. Premissa omnia et singula sicut premittitur concordata et expressa tam dictus Henningk Meverdes quam Alheit eius uxor hincinde pro se ac vice et nomine omnium suorum heredum et successorum quorum interest aut interesse poterit quomodolibet in futurum inviolabiliter tenere et observare neque per se vel alium seu alios occulte vel manifeste, directe vel indirecte quovis quesito calore vel ingenio contravenire nec decetero alter alterum pretextu huiusmodi impetere seu molestare, sub ypotheca et obligatione omnium et singulorum suorum bonorum mobilium et immobilium, presentium et futurorum solempni stipulatione interveniti promiserunt et quilibet eorum promisit, renuntiantes etiam hincinde partes omnibus et singulis exceptionibus, vis, doli, mali, fraudis nec sic celebrati contractus, successionis, hereditatis ac quibuscumque aliis defensionibus, remediis et subsidiis iurium canonici et civilis, per que contra premissis seu aliquo premissorum dici, obiici vel opponi posset, et presertim iurisdicenti generalem renuntiationem non valere nisi precesserit specialis, iuramento tamen salvo. Idcirco prefati coniuges nobis humiliter supplicarunt, quatinus eos ut prefertur separatim vivere, morari et habitare ac dictam concordiam per decreti nostri interpositionem permittere et ea in patientia tollerare dignaremur. Nos vero Henninghus officialis, iudex ordinarius prefatus, non per ipsorum coniugum proprias assertiones verum, etiam fidedignorum ralatione [!] sufficienter informati et instincti et ne ex malo peius oriatur, dictos coniuges separatim vivere, morari et habitare ac dictam concordiam per decreti nostri interpositionem permittimus et in patientia tolleramus, donec et quousque dicti coniuges inter se aut mediis eorum amicis ad meliorem vite frugem redigerint et aliud super hoc inter ipsos inspirante domino salubrius duxerint ordinandum, cetera de et super debito carnis ad permitimus continentia evitanda, reddenda, postulanda, relinquenda, super quibus conscientias ipsorum onoramus. In quorum omnium et singulorum fidem et testimonium premissorum presentes litteras sive presens publicum instrumentum exinde fieri et per notarium publicum nostrumque scribam infrascriptum subscribi et publicari mandamus nostrique sigilli officialatus iussimus et fecimus appensione communiri. Acta fuerunt hec Hildensem in consistorio publico, in quo iura reddi solent, sub anno a nativitate domini Millesimo quingentesimo decimo, indictione terciadecima, die vero lune quartadecima mensis octobris, pontificatus sanctissimi in Christo patris et domini nostri, domini Julii divina providentia pape secundi anno eius septimo, presentibus ibidem honorabilibus viris dominis Eggardo Schelen, ecclesie Hildesemensis vicario, et Hermanno Koldevey, presbitero Paderburnensis diocesis, testibus ad premissas vocatis specialiter atque rogatis. ||
||
Et ego Johannes Meyger, clericus Hildesemensis, publicus imperiali auctoritate notarius, venerabilisque viri domini Henninghi Molitoris, officialis et iudici ordinarii prefati ac huiusmodi negocii coram eo scriba, quia supradictis propositioni, conventioni sive concordationi premissorum, renunciationi, petitioni et decreto, interpositioni et permissioni omnibusque aliis et singulis premissis, dum sicut premittitur fierent et agerentur, unacum prenominatis testibus presens interfui, eas et unam et singulam sic fieri vidi et audivi, ideo hoc presens publicum instrumentum de manu mea propria scripta exinde confeci, subscripsi, publicavi et in hanc publicam formam redegi signoque et nomine meis solitis et consuetis unacum prelibati domini Henninghi officialis sui officialatus sigilli appensione signavi in fidem et testimonium omnium et singulorum premissorum rogatus et requisitus. ||
||
[Notarssignet links] Die ineinander gesteckten Buchstaben I und M auf einem Sockel, darunter der Text: Jo. Meyger notarius ssst [subscripsit].