Ek Ernst unde Hermen brodere gheheten de Wrisberghe bekennet openbare in dussem breve vor alle den, de on horen edder seen lesen [sic!], dat we hebben entfanghen unde entfanghet van dem erwerdighen heren hern Alberte, abbete abbete [sic] des stichtes to sunte Michahele bynnen Hildensem unde van synem cappittelle darsulves oren meygherhoff myd ver hove landes beleghen in dem dorpe unde up dem velde to Diderkesholthusen, alse dat dar beleghen is in wische, in holte, in weyde unde myd aller rechter tobehoringhe, udghesproken den worttins, den se in dem sulven dorpe hebben, also dat we des rowelken bruken moghen unde upnemen alle de fruchte, de darvan vallen unde werden moghen to unser beyder live. Hir vore schulle we unde willet dussen erghenanten abbete unde cappittelle gheven unde beredeliken betalen alle jar up sunte Michahelis dagh dre lodighe mark Hildenscher weringhe sonder hinder unde vortoch. Dusse vorscrevene dre mark schulle we unde willet on vorwissen unde vorvelighen myd borghen, dar on an ghenoghet, in der stad to Hildensem alle jar up sunte Margareten dagh edder vore, er we uns des nygghen van deme jare underwynnen. Ok so schulle we unde willet dusse vorbenomeden ver hove myd orer tobehoringhe nemede vorsetten noch vorkopen edder nenerlye besveringhe an deme ghude don, dat dussen benomeden heren unde dem stichte to sunte Michahele mochte to schaden komen. Wanne aver ek Ernst unde Hermen brodere erghescreven beyde dod sind, so schullen dusse erghenanten ver hove myd dem meygherhove myd orer tobehoringhe unde wad we up dem meygherhoff ghebuwet hedden dussen benomeden heren unde dem stichte quid, ledich unde los syn unde vrigh wedder an se vallen sunder hinder unde weddersprake unser erven edder jemedes van orer weghene. Alle dusse vorscrevene stucke unde artikel love we Ernst unde Hermen vor uns unde vor unse rechten erven dussem vorbenometen abbete unde cappittelle unde oren nakomelinghe in guden truwen stedevast unde unvorbrokelken to holdende sunder jenegherhande hulperede edder arghelist. To bekantnisse so hebbe we on dussen breff besegheld myd unser beyder inghezeghele vor uns unde vor unse erven. Vortmer we her Hinrick van dem Stheynberghe ritter unde Hans van Utze knape bekennet in dussem sulven breve, dat we ghelovet hebben unde lovet vor Ernste unde Hermenne brodere gheheten de Wrisberghe dussen erghenanten heren abbete unde cappittelle, weret, dat on jenich brock edder hinder schudde an allen dussen vorscrevenen stucken unde we darumme ghemanet worden sammet edder bysunderen, so schulle we unde willet nach der maninghe on bynnen den neghesten tokomenden vertheynnachten den broke vorvullen myd redeme ghelde edder myd ghenodighen panden, dad love we in guden truwen stede unde vast to holdende ane jenegherleye arghelist, unde hebben unse inghezeghel by dussen vorbenometen Ernste unde Hermene inghezeghel ghehenghet an dussen breff. Datum anno domini Millesimo CCCC° sexto, in die Cathedre.||