xxx [3x: untereinander] Lucius xxx [3x: untereinander] episcopus servus servorum dei venerabilibus fratribus archiepiscopis, episcopis^a et dilectis filiis abbatibus, prioribus et aliis ecclesiarum prelatis, | ad quos littere iste pervenerint, salutem et apostolicam benedictionem. Audivimus et audientes vehementi sumus ammiratione commoti, quod, cum fratribus de Reithinhasala^b sicut aliis omnibus Cisterciensis ordinis a patribus et predecessoribus nostris concessum sit et a nobis ipsis postmodum confirmatum, ut de laboribus, quos propriis manibus aut sumptibus excolunt, nemini decimas solvere teneantur, quidam ab eis nichilominus contra indulgentiam sedis apostolice decimas exigere et extorquere presumunt et sinistra interpretatione apostolicorum privilegiorum capitulum pervertentes asserunt de novalibus debere intelligi, ubi de laboribus est inscriptum. Quoniam igitur manifestum est omnibus, qui recte sapiunt, interpretationem huiusmodi perversam esse et intellectui sano contrariam, cum secundum capitulum illud a^c solutione decimarum tarn de terris illis, quas deduxerunt vel deducunt ad cultum, quam etiam de terris cultis, quas propriis manibus vel sumptibus excolunt, sint penitus absoluti, ne ullus contra eos materiam habeat malignandi vel quomodolibet contra iustitiam molestandi, per apostolica vobis scripta^d precipiendo mandamus, quatinus omnibus, qui vestre sunt potestatis, auctoritate nostra prohibere curetis, ne a memoratis fratribus de Reithinhasala^b vel a fratribus aliorum monasteriorum Cisterciensis ordinis, qui in episcopatibus vestris consistunt, de novalibus vel de aliis terris, quas propriis manibus vel sumptibus excolunt, vel de nutrimentis animalium suorum decimas presumant quomodolibet extorquere. Nam si de novalibus vellemus tantum intellegi, ubi ponimus de laboribus, de novalibus poneremus, sicut in privilegiis quorundam apponimus aliorum. Quia vero non est conveniens, ut contra instituta sedis apostolice temere veniatur, que obtinere debent inviolabilem firmitatem, per apostolica scripta^e vobis precipiendo mandamus, ut, si qui canonici, clerici, monachi vel laici contra privilegia sedis apostolice predictos fratres decimarum exactione gravaverint, appellatione remota laicos excommunicationis sententia percellatis, reliquos autem ab officio suo suspendatis et tam excommunicationis quam suspensionis sententiam faciatis usque ad dignam satisfactionem inviolabiliter observari. Ad hec presentium vobis auctoritate precipiendo mandamus, quatinus, si qui in fratres prescriptorum monasteriorum manus violentas iniecerint, eos accensis candelis excommunicatos publice nuntietis et faciatis ab omnibus sicut excommunicatos districtius evitari, donec congrue satisfaciant predictis fratribus et cum litteris diocesani episcopi rei veritatem continentibus apostolico se conspectui^f representent. Dat. Veron. IIII. non. martii^g.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 34, S. 34-36