In nomine sancte et individue trinitatis. Ego Rugerus | dei gratia Pataviensis episcopus omnibus Christi fidelibus in perpetuum. Nos, qui deo auctore cura pastorali sancte Pataviensi ecclesie deservimus, congruum est, ut benefacta venerabilium antecessorum nostrorum Pataviensium pontificum, videlicet Wolfkeri, Popponis, Manegoldi et Vdalrici, piis eorum exemplis incitati, quantum possumus, pro modulo nostro imitemur et iusticiam fratrum de Reitenhasela^a in remissione pedagii, quod vulgo mu^ota dicitur, quam nobis in representatione privilegiorum ipsorum in presentia chori nostri necnon et Pataviensium ministerialium satis evidenter probaverunt, pie recognovimus et liberum navibus eorum Patavie transitum in ascensu sive descensu una cum eis perpetuo indulsimus. Precipimus etiam sub districtione omnipotentis dei et extremi examinis, auctoritate quoque beati Stephani prothomartyris patroni nostri, ne aliquis officialium nostrorum vicissim sibi in hoc officio succedentium aut aliqua spiritalis secularisve persona predictos fratres inquietare presumat et contra nostre confirmationis instituta aliquam in eos exactionem faciat. Nam ut hec rata permaneant et inconvulsa in futura tempora, sigilli nostri inpressione communimus et testium subscriptione firmius roboramus^b. Huius rei testes sunt: Gotfridus archidiaconus, Albertus de Possemvnster, Rugerus de Lonstorf, Meingotus de Waldekke, Heinricus Zobel, Marquardus scolasticus, canonici Patavienses; ex laicis: Alrammus de Halse, Gerhohus, Rugerus, Heinricus Salzburgenses, Ortolfus et Heinricus fratres de Waldekke, Chunradus de Ualchensteine^c, Waltherus et Pilgrimus de Tanneberch, Hugo de Sauersteten; cives: Chunradus iudex, Waltherus Isenær^d, Duringus, Mahtfridus et alii quam plures. Dat. Patav. pontificatus nostri anno primo.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 116, S. 104-105