Nos Heinricus dei gracia palatinus comes Reni, dux Bawarie, notum facimus omnibus presentia inspecturis, quod, cum I inter ecelesiam de Raitenhasla^a ex una parte et fidelem nostrum Ottonem de Walde^b ex altera super iudicio possessionum et hominum dicte ecclesie in cometia sua Zidlaren^c existencium iam diu esset lis et contencio agitata, tandem in nos et Heinricum venerabilem prepositum Otingensem^d voluntarie ab utraque parte extitit conpromissum, unde et nos ambo promulgavimus concorditer arbitrium infrascriptum videlicet, quod dictus Otto ius et formam iudicandi observare debet et in bonis et hominibus ecclesie memorate, secundum quod ius se habet iudicii Otingensis, quod si ipse vel iudex suus transgressus fuerit, tunc infra spacium unius mensis in tali casu de predicto Ottone dominus abbas coram iudice nostro, qui tunc in Otinga^d fuerit, iusticiam postulabit, quam sibi predictus Otto coram ipso sine contradictione qualibet exhibebit. Item observabit et rata tenebit omnia iura, promissiones et laudamenta hactenus dicte ecclesie facta, de quorum veritate per litteras vel testes coram nobis vel a nobis iudice deputato per iusticiam poterit instrui et doceri. Dominus etiam abbas de voluntate sui conventus remisit omnia dampna et gravamina per dictum Ot(tonem) illata sue ecclesie sub hoc pacto, ut si, quod absit, in aliquo predictus fidelis noster contra premissa veniat, extunc teneatur ad dampna et sententias, pro quibus ista vice fuerat excommunicationis sentencia involutus. Et ut de approbacione et consensu partium plenius constet, sigillum utriusque partis apponi placuit instrumento presenti nostri nichilominus sigilli munimine roborato et etiam sigillo predicti prepositi in ipsa causa coarbitri nostri litteras presentes placuit ob maioris testimonii evidentiam insigniri. Testes enim sunt: magister Fr(idericus)^e plebanus in Lantshut, Chvnradus et Wintherus notarii, dominus Vlricus de Abensperch, Ortlibus de Walde^b, Fridericus de Prvnne, Marquardus de Schrovenhousen^f et alii quam plures. Act. et dat. aput Burchusam anno domini millesimo ducentesimo septuagesimo quinto, tercio kal. maii.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 343, S. 274-275