Ich Chu^onrat Tæhser^a vnt wir Hainreich vnt Chu^onrat sein svn^b offen vnt tu^on chunt allen den, di disen brief lesent oder ho^erent lesen, | daz wir alle dreî haben geben vnser vreiz aigen vnt vber al, swaz wir heten datz obern Hafnarn^c, daz mich von meiner erærn hausfrawen angevallen waz, der vorgenanten kneht mu^oter, der vreiz vnt ledigs aigen iz waz, vnser frawen vnt der samnung ze Raitenhaslach ze rehtem selgræt mit allem dem, daz da zv^o geho^ert, besuecht vnt vnbesueht, ze holtz vnt ze velt, ze haus vnt ze wismat^d, swi iz genant ist, vnt haben daz selbe||
aigen, als vor geschriben stæt, auf geselt auf vnser frawen alter dem gotshaus ze Raitenhaslach ze bleiben ewichleich an rehtes aigens stat. Wir veriehen auh offenbar, daz wir alle diê chrieg vnt ansprach, di wir iê gewnn hintz dem offt genantem gotshaus, swi diê waren, sleht oder vnsleht, diê wir doch emaln auh lazzen heten vnt verschriben vnter hern Ortliebs insigel von Aschauwe, in derselb uerrihtung wir auh warn gestanden vnt auh nu an der stund gesteen von der ansprahe, di wir heten von vnser swester wegen vnt ir chint vmb daz aigen datz Garlosing, daz wir noh sî dar nah furbaz niht schuln noh mo^egen gesprechen, wan wir noh sî dar an dehain reht haben. Wir haben auh gegeben vnt gelobt dem ersam abbt Vlreichein von Raitenhaslach in sein hant, daz wir di vnminn vnt die veintschaft, die wir heten vmb Chunraten den Chrispelsteter vnser swester wi^ert hintze Bræntlein aus dem Leuchental, also daz wir lauterleiehein vnt turnæhtichleichen sein frewnt sein worden vnt im furbaz gern dienen, ob er ez an vns vodert vnt sueht. Unt wan mein su^een Hainreich vnt Chünrat sich genaigten vnt sich so liebleich mit dem vorgenanten ersam abt Vlreichein habent vermint vnt gæntzleichein verslihte, hat der abt von sein trewen vmb di sahhe alle meiner tohter geben ein plaben mantel vnt ein mu^ot chornes vnt Chu^onraten meinem sv^on ein phunt phenning vnt zwelf metzen chorns vnt da zv^o vns allen drein drei saitze ro^eche. Unt daz daz selgræt vnt diê sahhe alle, als oben geschriben ist, von mir Chunraten dem Tæhser^a vnt von meinen sv^enen Hainr(eich) vnt Chu^onraten stæt vnt vnzebrochen beleih, wan wir aigens insigel niht enheten, so haben wir dise hantvest versigelt vnt bestætigt mit hern Ortliebs insigel von Aschauwe, der vns daz durch vnser vlig vnt groz pæt willichleichein hat geliehen an disew hantvest zv einem waren vrchunt. Diser sahhe aller sint gezevch: her Ilsunch der prior, her Vlreich der Gruntnær, her Chu^onrat der Wienner, her Ott der Sahs, her Geb(hart) der Chalb, her Ainweich von Wazzerpurch^e, her Hainreich der Hv^oter, der disew hantvest hat geschriben, bru^eder vnt mu^enich ze Raitenhaslach; her Vlr(eich) der pharrær von Halspach, der Rorær von Aufhausen, hern Jansen su^on von Ro^er, Chunr(at) der Auwer rihter ze Mermos, Gebolf der Strazperger rihter ze Marchartstain, Fridr(eich) der Chriespelsteter, Frid(reich) der probst von Zeidlorn, Eberh(art) von Hafnarn, Engelpreht von Hærpholtzhaim^f, Ch(unrat) von Stadlarn, Ortel, Wilhalm, H(ainreich) Puehs, dez abts knehte von Raitenh(aslach), vnt ander erwaerig zevg mær. Disew hantvest ist geben ze Raitenhaslach, do von Christes bu^ort warn vergangen tausent vnt drew hundert jar darnah in dem anderm jar, an sant Laurentii tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 499, S. 416-417