Ich Ekhart von Tanne der Ro^erer vergich vnd tu^en chund an disem brieff allen lewtten, daz dev chlag vnd der chrieg, di abbt Fridrich von Raytenhaslach gegen mir het vor herren Eberhard techent vnd richter zw Salczburg vmb daz gu^et ze Obernechinge, lazen wart von vns payden an schidleu^et herr Eberhart pfarrer dacz sand Jorigen, herr Chunrad Wyenner, mu^enich dacz Raytenhaslach, vnd an Rudolfen von Talgew, richter ze Salczburch, also waz sy dar vber spra^echen oder schiten, daz solt wir pêedew sta^et haben vnzeprochen, vnd wer dez nicht enta^et, der solt geuallen sein von allem dem recht, daz er an dein vorgenanten gu^et hiet. Dy selben schidlew^et mit gemainem rat schieden also, daz ich daz vorgenant gu^et ze Oberneching dem selbing abbt vnd seinem goczhaus ledichleich aufga^eb vnd iz her wider von im vnd von seinem goczhaus ze leibgedinge enphienge vnd ez hiet in nu^ecz vnd in werschafft v^encz an meinen tod vnd da von alle jar an sand Ru^eprechcz tag in dem herbst solte geben dreisikch pfenning Salczburger dem goczhaws ze Raytenhaslach zu einem vrchunde, daz dy aygenscha^efft dez vorgenanten gu^ecz dez selben goczhaws ist. Vnd gescha^ech daz von versavmunge, ||
daz ich dy^e selben dreisichk pfenning von sand Ruprechcz tage in acht tagen nicht enga^ebe, so solt ich ze hant von dem selben gu^et sechczig phfenning geben; versaumbt ich daz dar nach in acht tagen, so solt daz vorgenant gu^et dacz Obernechinge mit allem recht gewere vnd nu^ecz, versu^echcz vnd vnversu^echcz, ledichleichen vnd vreileichen wider an angeuallen daz selbe goczhaws ze Raytenhaslach. Ez sol auch nach meinem tod daz selbe leibgedinge derainen meinen erben anerben vnd sol daz goczhaws ze Raytenhaslach ledichleichen vnd an allen chrieg wider angeuallen. Dar v^eber vergich ich an disem brieff, daz ich dy^e vorgenanten schidung sta^et wil haben vnd vnzeprochen vnd gib dar v^eber zu einem ebigen vrchundt disen brief mit dez capitels ze Salczburchk vnd mit meinem insigeln versigelt, vnd sind diser sache czewg: herr Weichard von Polnhaim charherr ze Salczburg, maister Wernhart caplan in dez pischolfs hoff ze Salczburchk; herr Hainreich von Visach, Charel der Newnchiricher, der Weizze von Lauffen, Fridreich der Darme, Hainreich vnd O^ertl dez abcz chnecht von Raytenhaslach vnd ander pider la^ewt. Vnd ist daz geschehen ze Salczburch, do von Christus gepu^erdt waren tausendt jar drewhundert jar vnd dar nach in dem ersten jar, an der heyligen martra^er tag sand Tyburcii vnd Valeriani.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 496, S. 413-414