Ich Vlreich Galle pu^orger ze Muldorf vergieh vnd tun chunt alle den, di disent brief lesent oder ho^ernt lesen, das | ich mit gu^otem willen meiner hausfrawen Alhaiten vnd meines suns Andres vnd auh mit dem willen meines bru^oders chint Chunrats des Gallen, di genant sint Ekhart vnd Chu^onrat, vnt mit dem willen meiner zwoier tohter Elspeten vnd Agnesen vnd mit dem willen vnd gunst ander meiner frewnt han^a durich got vnd durich mein^b reht vnd grossen notdurft ze chauffen geben dem erwærigen abbt Gebharten vnt sinem gotzhaus ze Raitenhaslach mein rehts aigen zwai gu^ot, der ains haist ze Chopel lehen vnd das ander pi der Strazz^c, mit alle dem, das dar zv^o geho^ert, besuhts vnd vmbesuhts, fu^er rehts mein ledigs aigen vmb drewzehen phunt vnd vmb sehs schilling^d Regenspu^orger allen weis mit dem læutchauf vnd mit allem geding. Vnd wan mein zwen su^en Ludweich vnd Vlreich vnd^e meines^e vorgenanten bruder su^on Johans pi dem lande niht ensint, so sint an der selben stat pu^ergen warten für allev ansprach mein aidem Peter vnd Chunrat mein aidem vnd Seibot mein bru^oder, also doch vnd mit sotainer beschaidenhait, swenn das ist, das sih dî vorgenanten chint verzeihent aller ansprah hintz dem vorgenantem gu^et, das si den ledig sint der purgenschaft vnd alles geluds. Der selben sahh fu^er di offt vorgenanten chint sint auh purgel mein vor genant hausfraw Alhait vnd mein tohter Agnes für allev ansprah. Vnd wan disev sahh vor meinem herren herrem Geroch dem Radekger vnd vor dem erwærigem pharrer dem Lampotigner herrem Wernhern vnd vor den zwelifen genanten pv^ergern ze Muldorf vnd mit ir rat geschehen ist vnd mit ander purger do, daz^f auh der chauf vnd disev sahhe dem vorgenanten ersam abbt G(ebharten) von Raitenhaslach vnd seiner samnung stæt vnd vmbechrencht beleih vnd zv einer ewigen erchantnuss, habent si disen brief verinsigelt mit ir selber vnd mit der stat insigel. Diser sahh sint zevg: di vorgenant herren her Geroh der Radekger^g, her Wernher der pharrær, her Hainreich der Polligner^h, Johans sein sv^on, Fridreien Hollir, Ekk, Engelpreht der Neumaister, Peter des Peihaims aidem, Reisch des Tanners bru^oder, Chunrat der zwelifer, Langott, Fridr(eich) der Lang, Ot der Zehenter, Chunr(at) der Voriher, der Guglingner, Vlr(eich) der Wimperger vnd ander bider lævt mer. Diser brief ist geben, do von Christes bu^ort waren tausent drew hundert jar dar nah in dem sibent jar, des næhsten mitichens nah ostern.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 546, S. 460-461