Wir Heinreich, Ott vnd Heinr(eich) von gotes genaden pfallentz grafen ze Rein vnd hertzogen in Baieren verjehen offenbar an dem | brief, wan der ersam abbtt Illsunch vnd der convent ze Raitenhaslach sv^emlichev irev gu^ot vnd vrbor, dev her nach benenet sint, daz ist in vnserm gericht in dem Grazzawertal zwai ze V^eberse, eines in dem Albrach vnd Aich vnd in dem Chiemka^ew, in vnserm gericht ze Trawnstain einen hof ze Sazzawe vnd ein gv^ot ze Nvstorf^a, durch ir notdurft ze dienst habent gelegt, daz man in vische da von dien, der si zv ir pfrv^ent bedurffen in dem adventt vnd in der vasten vnd ander zeit. Vnd wan wir gotes dienst in demselben vorgenanten chloster ze Raitenhaslach alle zeit meren wellen vnd fu^edern, haben wir ze selgeræt vnser lieben mv^eterlein frawn Jævtten, der got genad, vnd auch durch vnser vnd aller vnsrer vordem vnd nachchomen hail vnd sæld dem oben genanten abtt vnd dem conuent vnd auch ir holden, di auf den oben genanten ir vrborn sitzen in den vorgenanten vnsern gerichten, nach vnsers rates rat erlavbet vnd gegeben den vischauf bei den Chiembse vnd auch erlauben vnd geben in mit disem brief, daz si fu^erbas ewichlich desselben chauffes von vns, von vnsern nachchomen, vnsern amptlævten vnd von vnsern vischærn vnd vischchævffeln vnd von allen den vnsern||
allen weis vnengolten beleiben. Vnd daz in daz alles gantz stæt vnd vnzebrochen beleih, dar v^eber ze vrchv^end geben wir in den brief versigelten mit vnsern insigeln. Der ist gegeben ze Pvrchausen, da von Christes geburtt waren tausent jar drev hvndert jar vnd dar nach in dem zwaintzkisten jar, an sand Elspeten tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 635, S. 542-543