Adrianus Episcopus Servus Servorum Bei dilectis filiis Megenhardo Preposito Ranshovensis Ecclesie beati Pangracii martiris eiusque fratribus tam presentibus quam futuris regularem vitarn professis in perpetuum. Regularem vitam eligentibus apostolicum convenit adesse presidium, ne forte cuiuslibet temeritatis incursus aut eos a proposito revocet aut robur, quod absit, sacre religionis infringat Ea propter dilecti in Domino filii, Hainrici illustris Bawarie et Saxonie Ducis precibus inclinati vestris iustis postulationibus clementer annuimus et prefatam Ecclesiam beati Pancracii martiris, in qua divino vacatis officio, sub beati Petri Apostolorum Principis tutelam protectionemque suscipimus et Apostolice sedis privilegio communimus. Inprimis siquidem statuentes, ut ordo canonicus, qui secundum regulam beati Augustini eodem in loco noscitur institutus, perpetuis ibidem temporibus inviolabiliter conservetur. Preterea quascunque possessiones, quecunque bona eadem Ecclesia impresentiarum juste et canonice possidet aut in futurum concessione Pontificum, largitione Regum vel principum, oblacione fidelium seu aliis justis modis prestante Domino poterit adipisci, firma vobis vestrisque successoribus et illibata permaneant. In quibus hec duximus propriis exprimenda vocabulis: Ecclesiam videlicet S. Michaelis cum decima et iure parochiali, Capellas Neunchirchen, Haentenberg, Geroltzberg et capellam S. Stephani in Praunawe cum pertinenciis earum, Capellam Howerch cum pertinentiis suis in ea libertate, in qua frater noster Ewerhardus Salzburgensis Archiepiscopus vobis scripto proprio racionabiliter confirmavit, ut videlicet nullus in eis preter ipsum Archiepiscopum et Ecclesie vestre prepositum aliquid debeat ordinare. Sane novalium vestrorum, que propriis manibus aut sumptibus colitis sive de nutrimentis vestrorum animalium nullus a vobis decimas presumat exigere. Porro sacramenta Ecclesiastica a Dyocoesano suscipiatis Episcopo, siquidem Katholicus fuerit et graciam atque communionem apostolice sedis habuerit eaque gratis et absque aliqua pravitate vobis voluerit exhibere. Alioquin Catholicurn quemcumque malueritis, adeatis antistitem, qui nimirum nostra fultus auctoritate, quod postulatur, indulgeat. Obeunte vero te nunc eiusdem loci preposito vel ad alterius Ecclesie regimen transeunte sive tuorum quolibet successorum, nullus ibi qualibet surreptionis astutia seu violentia preponatur, nisi quem fratres communi assensu aut pars consilii sanioris secundum Dei timorem et beati Augustini regulam providerint eligendum. Ad haec quoniam locus vester sic est institutus, ut aduocatus bonorum prefati Ducis in partibus illis ejusdem quoque loci sit advocatus prohibemus, ut nec ipsi nec alicui subministro ejus liceat eundem locum injustis gravaminibus infestare, sed eum vice jam dicti Ducis, sicut ipse instituit et scripto suo firmavit, cum mancipiis et possessionibus suis idem advocatus defendere et tuen debet eo tenore, ut querimonias tam vestras quam mancipiorum vestrorum audiat et congruam justiciam faciat; paratam vero nullam a vobis propter hoc exigat, sed tantum de horreo prefati Ducis secundum antiquam institutionem tempore suo accipiat. Super hoc etiam nullam potestatem disponendi in claustro vel Mancipiis aut possessionibus vestris memoratus Dux eidem advocato concedat, Sed ut loco suo vos protegat et eternam retributionem tantum inde requirat. Exactiones quoque super vos vel super mancipia vestra a quoquam fieri idem Dux penitus interdixit. Nos quoque omnia hec vobis concedimus et auctoritate apostolica confirmamus. Si autem ipse advocatus contra hec venire temptaverit et secundo ac tercio commonitus non emendaverit, consilio et auxilio prefati Ducis ipsa advocacia ab itiutili auferatur et alius idoneus loco eius substituatur. Sepulturam quoque ipsius loci liberam esse concedimus, ut eorum, qui se illic sepeliri deliberaverint, devotioni et extreme voluntati, nisi forte excommunicati vel interdicti sint, nullus obsistat, salva iusticia matricis Ecclesie. Decernimus ergo, ut nulli omnino hominum liceat prefatam Ecclesiam temere perturbare aut eius possessiones auferre vel ablatas retinere, minuere aut quibuslibet molestiis fatigare, Sed omnia integra conserventur eorum, pro quorum gubernatione aut sustentatione concessa sunt, usibus omnimodis profutura, salva sedis apostolice auctoritate et dyocoesani Episcopi canonica iustitia. Si qua igitur in futurum ecclesiastica secularisve persona hanc nostre constitutionis paginam sciens contra eam temere venire temptaverit, secundo tertiove commonita si non satisfactione congrua emendaverit, potestatis honorisque sui dignitate careat reamque se divino iudicio existere de perpetrata iniquitate cognoscat et a sacratissimo corpore et sanguine Dei et Domini nostri Redemptoris Jesu Christi aliena fiat atque in extremo examine districte ultioni subiaceat. Cunctis autem eidem loco iusta servantibus sit pax Domini nostri Jesu Christi, quatenus et hic fructum bone actionis percipiant et apud districtum iudicem premia eterne pacis inveniant. Amen. Datum Rome apud sanctum Petrum per manum Rolandi S. Romane Ecclesie presbiteri Cardinalis et Cancellarii IV. Kal. Febr. Indictione VI. Incarnationis Dominice Anno MCLVII. Pontificatus vero Domini Adriani Pape IV. Anno IV.

Source Fulltext: OÖUB 2 (Wien 1856) S. 283-285