Quoniam omnium habere memoriam diuinum est pocius quam humanum et ob hoc scripture testimonio labili memorie hominum succurritur, ne tractu temporis ea, que inter bonos fideliter aguntur, deuenire ualeant in errorem. Nos igitur Chunradus clericus canonicus Maticensis et plebanus in Ering et Gebhardus laicus fratres dicti de Veltpach, filii Gebhardi militis felicis memorie quondam de Veltpach presentibus protestamur, Quod, cum pro morte patris nostri ob remedium et salutem anime ipsius teneamur ecclesie in Ranshoven, aput quam sepultus est, dare redditus unius libre monete usualis nec eis debitum huiusmodi utiliter ualeamus exsoluere in presenti, cum honorabili uiro domino Sifrido dei gratia preposito et cum capitulo dicte ecclesie sufficienti deliberacione habita unanimi uoluntate conuenimus in hunc modum, Quod curiam nostram in Huntorn sibi a nobis assignatam recipiunt pleno iure in nulla sui parte occupatam sev distractam, non tamen donacionis titulo, sed sub hac forma, Vt de prouentibus ipsius curie annuatim sibi recipiant ad unam libram de arbitrio boni uiri, quem ibi officialem constituerint, nec non de arbitrio villici in ipsa curia pro tempore residentis, residuum uero nobis uel alteri nostrum soluent. Ad hec de hiis, que annis singulis dictis dominis de Ranshoven ex ordinatione sev institutione ipsius curie persolui contingerint (sic), ipsi retinebunt partem, que pro rata ad libram unam ad ipsos spectantem pertinebit, porcionem reliquam similiter nobis soluent. Sub huiusmodi autem forma premissa curiam nostram prefatam sibi per nos assignatam retinebunt libere, quoad usque per nos aut successores nostros eis dabuntur et assignantur redditus unius libre monete usualis vel denarii, quos loco dictorum reddituum soluendos deputauerint quatuor boni uiri, quos utrimque ad hoc decreuerimus eligendos. Nos uero medio tempore nullum nobis ius ordinationis in dicta curia reseruamus. Immo si ipsam forte alienare uellemus, dictos dominos sev capitulum tenemur requirere eisque in uenditione, quantum conuenienter possumus, condescendere, si eis placuerit ad emendum. Verum quia dicta curia non est plene in omni sua parte ad culturam redacta et habet situm ad molendinum ponendum, Si dicti domini sev capitulum propter meliorationem circa ipsam curiam aut in structura molendini expensas facere decreuerint, super hiis requirere nos debebunt et expensas, quas utiliter et necessario de nostra uoluntate fecerint, eis ad consilium duorum uirorum uel quatuor, quos ad hoc utrimque elegerimus, refundemus. Ceterum dicti domini memoratus prepositus et capitulum Ranshovense vniuersaliter singuli et singulariter vniuersi firmissime promiserunt, Quod singulis annis in anniuersario patris nostri cum sollempni conpulsatione canpanarum sollepniter (sic) agant officium defunctorum et eodem die dominus prepositus facere debebit consolationem dominis in Refectorio congruentem. Vt uero ordinatio et conuentio supradicta de consensu et uoluntate dictorum dominorum prepositi et capituli Ranshovensis appareat processisse quodque de nostra parte robur habeat firmitatis, presentem paginam super hoc editam sigillo dicti prepositi et sigillo capituli nec non sigillo nostro conmuni deliberatione duximus muniendam. Datum et actum Ranshoven in Conuentu Anno domini M. CC. LXXV. In octaua Martini episcopi et confessoris.

Source Fulltext: OÖUB 3 (Wien 1862) S. 432-434, Nr. 470