Ich Ott, vnnd Jch Michael zue Teiming, vnnd vnßer baider Hausfrawen, vnnd all vnnser Erben, vnnd Nachkhomen, veriechen offenbahr mit dem brief, allen denn die in ansehent, oder horent lösen, Daß wür mit giettlichen vnnsern willen, vnnd nach Erbaren bider leithen Rhat, Lijpen, vnnd Gebhardten denn Denckhen Jhren Haußfrauen vnnd all Jren Erben, vnnd Nachkhomen, Daß Wasser haben lassen fiehren, daz den Vhrsprung hat in vnnsern Höffang, vnnd haben dasselben angehöbt zu fiehren, dasselbe Wasser mit ainem graben durch vnnsern grundt vnnd Poden, ze Teiming, vnnd ist vrbaer, vnnd sollen auch den Graben haben vnd machen, ohne vnnser Miehe, vnnd Schaden, also in den beschaiden. Daß wir daß obgenannt Wasser haben sollen von Sanct Georgen Tag, vnzt auf Sanct Michaels Tag alle Jahr Jehrlichen, von Sambstag Morgen, vnczt an den Sonntag Morgen, So soll dann daß obgenannt Wasser Rünen, vnnd gehen dem Ehegenannten Lijpen, vnnd Gebhardten, Jren Hauffrauen vnnd allen Jren Erben, vnnd Nachkhomen, alle Jahr Jehrlichen, von Sanct Geörgen tag, vnczt auf Sanct Michaels Tag, durch vnnsern Grundt, vnd Poden, auf Jren Gründt (vnnd) Poden, den Sye habent zu Pogenhouen, vnnd ist Rannßhouer Erb, an aller ansprach, vnnd Jhrung, es ist auch getädingt, ob wür im herbst wassern thuen wolten, von St. Michaels tag Vnczt auf St. Geörgen, aller Jährlichen von Sambstag morgen, vnczt auf den Montag morgen, So soll dann aber daz Ehegenannt Wasser den obgenannten Rünen vnd gehen, alle Jahr Jährlichen, von St. Michaels Tag, vnczt auf St. Geörgen Tag, von Monntag Morigen vnczt auf den Sambstag morgen, in aller der Maß, vnd oben verschriben ist, vnnd sollen sye darin mit nichten Jhren, noch engen, weeder mit noch ohnne recht, Ohn geuär. Ob sye vnnß den graben nicht ohnn vnnsern schaden vnnd Mühe hietten, daß Rödlich vnnd billich währ, da mögen wür woll zu thain vnnd Röden daß vnnser notthurfft ist. Wür haben in auch daz obgenant Wasser, vnnd auch den Graben, also bestett, vnnd auch Richtig gemacht, auß vnnserer Nucz vnnd gewehr, in die Jhren, mit Casstners handt alß vrbars Recht ist, Vnnd auch des lanndes ist, vnnd welcherley Khrieg oder Jrung sye fürbaß darumb angieng, daß von vnnsertweegen geschäch, oder von wem sich daz fiegte mit dem Rechten, daß sollen wür in alzeit außrichten, mit dem Rechten, in ohn allen Jren schaden. Vnnd ob wür daz wasser oberhalben nemmen, vnnd Wasser wolten, zue vnnser notthurfft, des sollen sye vnnß nicht wider sein, ohne geuähr, vnnd sollen wür dann gleich mit einander wassern, Sye halbe wochen, vnnd wür halbe wochen, Vnnd waß wür mit ihn darumben khriegen, oder Rechten wolten, wie daz genannt wehre, daz sollen sye alles hincz vnns behabt haben, vnnd wür gein (in) verlohren haben. Were auch den brief Jnnen hat mit Jren guetten willen, die habent dieselben Rechten hincz vnnß, recht alß in selber, daryber geben wür in den brief mit Hermans des Schreibl die zeit Casstner zu Bůrkhaußen anhangenten Jnsigl versiglt, der vnnß daz an den brief gehangen hat. durch vnnser vleissigen beth willen Jnn vnnd seinen Erben ohn schaden. Darumben wür vnß mit sambt vnnßern Hausfrauen, vnnd Erben, vnnd Nachkhomen verbündten mit vnnsern threuen, alles daz stett ze halten, vnnd war ze lassen, daß oben verschriben stehet. Deß sindt Tädinger gewösen vnd seindt auch zeugen der gebethe vmb daß Jnnsigl Friedrich von Wurlach, vnnd Bernhardt der Rämmer, vnnd Seidl von Traubing, vnnd Conradt der Nidermayr von Berkheim, vnnd Conradt der Holczmann, zu ober Berkheim, vnnd ander Erbarr leith genueg. Daß ist geschechen da man zelt von Christi geburth Dreyzehen hundert Jahr, darnach in dem Neün vnd Sibenczigisten Jahr an St. Pancräzen Tag.

Source Fulltext: OÖUB 9 (Wien 1906) S. 631-633