BONIFACIUS episcopus servus servorum dei. Universis christi fidelibus presentes litteras inspecturis, Salutem et apostolicam benedictionem. Dum precelsa meritorum insignia quibus regina celorum virgo dei genitrix gloriosa sedibus prelata sidereis quasi stella matutina prerutilat devote considerationis indagine perscrutamur, dum etiam intra pectoris archana re-volvimus quod ipsa utpote mater gratie, misericordie et pietatis amica, humani generis consolatrix pro salute fidelium qui delictorum onere pregravantur, de clementissima ipsius pietate sperantium sedula exoratrix ad regem quem genuit intercedit, dignum quin potius debitum arbitramur, ut christi fidelibus ad eiusdem virginis assiduam venerationem iugemque memoriam quasi quibusdam allectivis muneribus indulgentiis videlicet et remissionibus invitemus, ut exinde reddantur divine gratie aptiores. Cum itaque sicut accepimus in ecclesia Pataviensi singulis Sabbatinis Quadragesimalibus ac Quatuor temporum diebus, necnon in singulis vigiliis predicte virginis gloriose ad laudem et honorem eiusdem virginis, Salve regina solenniter consueverit decantari, et ad decantationem huiusmodi fidelium multitudo ingenti devotione confluat copiosa. Nos cupientes devotione huiusmodi feliciter conservari pariter et augeri, et ut fideles ipsi ad illam eo fortius animentur quo ex hoc maius animarum commodum se speraverint adipisci de omnipotentis dei misericordia et beatorum Petri et Pauli Apos-tolorum eius auctoritate confisi omnibus vere penitentibus et confessis predicte decantationi interessentibus singulis videlicet dierum et vigiliarum predictorum diebus quibus decantationi huiusmodi in dicta ecclesia interfuerint devote, Duos Annos et todidem Quadragenas de iniunctis eis penitentiis misericorditer relaxamus. Volumus autem quod si alias personis que decantationi huiusmodi interessent aliqua alia indulgentia imperpetuum vel ad certum tempus nondum elapsum duratura pro nos concessa fuerit presentes littere nullius existant roboris vel momenti. Datum Rome apud Sanctum Petrum II Nonas Octobris Pontificatus nostri Anno Nono. Gratis de mandato domini nostri pape. (Scriptor): T. Fabri

Source Fulltext: Peter Peusquens, Karlsruhe