Wir Niclaus von gots gnaden Herzog zu Calabre vnd zu Lothringen Marggraff Marggraff zu pontamousson prince zu geronne vnd graff||
zu Thoars Bekennen vnd dunt kunt offentlich an disem briefe das vnser lieber getruwer Henrich von warnsperg als von wegen fulkerts von||
ellentz sine swehers uff hute datum desselben von vns zu lehen empfangen hat alles das so derselb fulkert von vnserm benanten hertzogtum lothringen||
zu lehen gehabt empfangen getragen vnd besessen hat vnd hat vns douon huldunge glubde vnd eydt geton vns getruwe vnd holt zu sind||
vnsern schaden zu warnen vnsern frommen zu werben auch sinen gegenbrieff vnd erclerunge bynnent geburlicher zijt zu geben vnd sust alles das||
zu tund das ein man sinem heren von solicher lehen wegen tun sol vnd pflichtig ist dozu wir ine empfangen vnd domit belehent habent mit||
beheltnisz vnsers vnd eyns yetlichen rechten de von so heissen vnd beuelhen wir allen vnd yetlichen vnsern amptluten vnd hindersaszen ob||
brestenhalb empfengnisz des gemelten fulkerts guter vnd lehene oder der einsteils versperret werent das sie hant douon tun vnd den obgenanten||
henrich der gentzlich vnd vngehindert geniessen lossen one eynichen indrag Des zu vrkunde so han wir vnser ingesigel tun hencken an||
disen brieff der geben ist uff mitwoch nach sant Matheus dage des iores dusent vierhundert vnd eyn vnd Sibentzig