Ich Heintze Greuse wohnhafftigk zu Hesseler, Elisabeth seine eheliche Hausfraw, thun kundt vor uns alle unsere rechte Erben unndt Erbnehmer in diesem Brieff öffentlich bekennende das wir einen steden vesten Kauf uff einen widderkauff recht und redlich verkauft habenn, in und mit krafft dieses Brieffes verkauffen zwantzig sechs Albus jehrlich Zins uff Sanct Michaelis tagk felligk auß unndt von unserem Haus unndt Hoff sampt einer halben Hube Landes ahn Jost Thomas und Johannes Schmidden st?ende, undt habensolchen Verkauff getan den Gotteskasten zu Melsungen vor unndt umb zwantzigk Guldten, ieden zu zwantzigk undt sechs Albus den Albus zu nheun pfennigen gerechnett, wilchs geltz uns der Casten vorsteher vor obgemeltten jehrlichen Zins geben unndt bezahlt haben, als itzo seind Reitze Teies unndt Johann Elnbergk der Junger, sagen sie obangeregter Summa gelchs hirmit quidt ledigk und wohlbezahlt loß. Unndt wir verkeuffere obgemeltt unndt unsere Erben sollen und wollen unsern Keuffern unndt ihren Nachkommen benenter jherlichen Zinse uff einen ieden Sanct Michaelis tagk sonder allen ihren Costen unndt Schaden frei sicher hebendigk machen unndt so offt ihnen das noth thue wehren vertreuen unndt schadtloß halttenn. Unndt ob wir in der Bezahlunge des jherlichen Zinse uff einen ieden Sanct Michaelis tagk seumigk wurden (das doch nicht sein soll) machten sich unsere Keuffere alle zusprucht Zinse, Costen Schadens unndt heuptgelches ahn obgemeleten underpfanden mit oder ohnt recht erkommen unndt erholen unndtob an obenertzehlten underpfanden gepruch oder Verhinderung seindt wie dem möchet so erlauben wir den Keuffern unndt ihren Nachkommen darzu further sich an allen andern unsern Gütern liegenden undt fahrenden zuerholen. Darmit gleich den obangetzeigten underpfanden zuthun doch uns verkeuffern unndt unsern Erben die Losunge iedes Jhars uff Sanct Michaelis tagk mit zwantzigk Gulden obgemeltter wehr zu thun vorbehaltenn wilchs unß unsere Keuffere oder ihre Nachkommen nicht weigern sollen, so ferne wir ihnen allen erschienen unndt versessenen Zinß sampt Costen unndt Schaden zuvor belegt und bezalt hetten. Es redden Jost Michell, Curde Hans unndt Jacob Schmidde uf ihre Wahrheit das solche underpfandt genugsam undt nitmandes mehr verschrieben, davor sie burge unndt selbst schuldigk sein wollen und sollen. Undt das zu wahrem Urkundt haben wir obgenete Verkeuffere vor uns undt unsere Erben die erbarn Hansen Fleischhauer unndt George Gleimen itzo Renthschreiber unndt Schultheissen zu Felsberg diesen Brieff zuverfertigen, zuunderschreiben unndt zuuntersiegelen erpeten. Wilchs wir umb ihrer bitt willen doch uns unndt den unsern ohnt Schaden alß geschehen bekennen. Datum.