Wir Grave Johanns von Sultz hofrichter von des allerdurchluchtigisten fursten unnd herren in Fridrichs Roͤmischn kaisers zu allenntzitten merers des Richs zu Hungern Dalmatien Croatien etc. Kunigs hertzogen zuͦ Oͤsterrich unnd zu Stir etc. unnsers allergnadigisten herren gewaltte an siner statt uff sinem hove zuͦ Rotwil embieten den fursichtigen ersamen unnd wysen burgermaister Rat unnd allen burgern gemainlich der statt Spyr unnser grus unnd tüen uch kund Das Iacob Neff der Küffer zuͦ Strasburg uff dem hove zuͦ Rotwil von Motzen Adam zu spyr als verrgeclegt das er In mit urtail unnd rechtem gericht inndir aucht des hoves zuͦ Rotwil getan unnd verschribn hat. Unnd das Im verbietbrieff uber In erkennt sind. Darumb von des obgenannten unnsers allergnadigisten herren des Roͤmischen kaisers gewaltte so gebietten wir uch vestitlich das ir den egenannten offenn verschriben aͤchter In der vorgenanntn statt spyr noch In zwingen bennen unnd gebietten daselbs nit enthalttend husend noch hofennd essen noch trinken gebennd noch sunst dhain gemainsamin mit Im habennd. Wann tattennd Ir des nit unvertzogenlich unnd kaͤme das von uch zuͦclag man richte darumb zuͦuch nach recht geben mit urtail mit des hofgerichtz zuͦ Rotwil uff gedrucktem Insigele besigelt uff sannt pauls tag Conversionis Anno domini MCCCCLXXIIII to.