Wir Grave Johannis von Sultz hofrichter von des allerdurchluchtigisten fürsten und herren hern friedrichs Romisch(e)n kaisers zuo allen ziten merers des Richs zuo Hungern dalmacien croacien etc. kungs hertzogen zu Osterrich unnd zuo Stir etc. unnsers allergenädigisten Herren gewalte an siner statt uff sinem hove zuo Rotwil Bekennen offenlich und tuen kunt allermeniglich(e)m daß wir hannsen weber zuo Spir usser der aucht des hoves zu Rotwil gelassen unnd zu dem auchtbuch des sellen hoves dolieren und Cantz-elieren getan haben mit willen und gunst Cu(o)nrat Schrotten zu Rotwil von des clag wegen ir darinne gewesen ist Darumb von des obgenanten unsers allergändigist(e)n herr(e)n des Römisch(e)n Kaisers gewalte so kunden wir den egenanten hannsen weber widerumb usser dem unfrid in den frid unnd erlouben in menglichem widerumb zuo gemainsam der vor geschriben aucht halb mit urkunt unnd Crafft ditz briefs mit des hofgerichtz zu Rotwil uff gedrucktem Insigel im besigelt an Simons unnd Judas abend ap(osto)lo(rum) nach Cristi gepurt viertzehenhundert sibentzig unnd vier Jare