Gregorius episcopus servus servorum Dei. Venerabili fratri .. Warmatiensi episcopo salutem et apostolicam benedictionem. Nec novum est peccatis exigentibus nec insolitum quod abhominantur impii viros iustos eo quod non est conventio lucis ad tenebras nec Christi ad Belial participatio potest esse. Verum et si perversi difficile corrigantur ut a pravitatibus resipiscant, sunt tamen ne iustis noceant cohibendi ut malorum timore sublato iusti tranquilla devotione letentur, proficiendo sibi per vite meritum et aliis per exemplum. Intelleximus siquidem nec posssumus sine amaritudine recensere quod quidam filii Belial tue diocesis, habentes odio disciplinam, dilectos filios fratres ordinum predicatorum et minorum impie persecuntur in devotionem eorum non solum linguas laxando maliloquas, sed etiam famosas immo infames intonando publice cantiones in animarum suarum periculum et contemptum ecclesiastice honestatis quod te nunquam decuit sustinere, quin prius pene quam culpe rumor talium ad nostram audientiam pervenisset. Ne igitur saltem amodo inexcusabilis habearis si tales desieris castigare, fraternitatem tuam rogamus et monemus attente per apostolica tibi scripta precipiendo mandantes, quatinus dictos fratres habens ob reverentiam apostolice sedis et nostram propensius commendatos, ipsos ab huiusmodi molestiis, iniuriis, contumeliis et convitiis tuearis, ita quod viros religiosos videaris diligere et nos devotionem tuam possimus merito commendare. Alioquin dilectis fillis .. preposito,.. decano et .. cantori Wormatiensibus nostris damus litteris in mandatis ut te in executione mandati nostri cessante id sublato appellationis obstaculo exequantur. ||
 Dat. Perusii III non. septembris pontificatus nostri anno tertio. ||
 (Horst Enzensberger)