Sciant presentes et futuri quod Ricardus dei gratia abbas de Waltham et eiusdem loci conuentus ad instantiam Dauid abbatis et conuentus Sancte Osithe de assensu et uoluntate uenerabilis patris Eustachii diuina miseratione Londoniensis episcopi necnon et Magistri Ricardi persone ecclesie de Walda que ad presentationem dicti abbatis et conuentus de Waltham dinoscitur pertinere concesserunt ut dicti abbas et conuentus Sancte Osithe capellam in honore Sancti Thome Martiris infra limites predicte ecclesie parochie de Walda in feudo suo apud Nouum Locum libere edificent et quantum in eis est per idoneum sacerdotem ab eisdem abbate et con uentu Sancte Osithe suffitienter sustentandum ibi diuina ut decet cotidie si uelint faciant celebrari Saluo per omnia iure predicte matricis ecclesie uidelicet ut predicta capella plene sit subiecta eidem matrici ecclesie et capellanus in ea ministraturus antequam admittatur administrandum in eadem persone pro tempore predicte ecclesie de Walda a predictis abbate et conuentu Sanct Osithe presentetur Et eidem persone et ecclesie sue iuramento fidelitatis expresse obligetur quod in nullo matrix ecclesia per ipsum scienter sentiet lesionem Et quod nunquam siue ipsius persone uel assignati sui licentia speciali in dominicis diebus uel in aliis festiuitatibus que solent et debent per annum a populo feriari preter quam in die passionis et in die translationis Sancti Thome martiris et tempore nundinarum si ibidem fuerint constitute aliquem parochianum suum ad diuina scienter recipiet nec panem benedictum alicui parochianorum ministrabit nec recipiet confessiones uel purificationes sine persone licentia speciali Nec erit ibi baptisterium nec sepultura mortuorum Et si contingat quod aliqua obuentio a predictis parochianis in predicta capella obuenerit eam persone matricis ecclesie uel eius assignato sine dilatione retentione et more dispendio restituet nec aliquid a dictis parochianis occulte uel manifeste recipiet in preiuditium matricis ecclesie Si ibi uero fuerint nundine persona matricis ecclesie toto tempore nundinarum per se uel per sacerdotem suum in predicta capella et etiam in predictis festis Sancti Thome si uelit ministrabit et omnes obuentiones toto tempore nundinarum et in predictis festis Sancti Thome undecumque et a quibuscumque obuenerint sine contradictione recipiet et capellanus capelle interim in matrice ecclesia sine contradictione ministrabit set nullis aliis diebus per annum compelletur extra predictam capellam ministrare Obuentiones uero que in aliis temporibus ab extraneis et transeuntibus predicte capelle obuenerint cedent integre ad sustentationem capellani capelle saluis matrici ecclesie duabus libris cere a capellano capelle singulis annis in festo beatorum Petri et Pauli reddendis Quicumque autem ex deuotione aliquid assignare uel conferre uoluerit ad edificationem uel ad emendationem siue ad omatum capelle sepedicte licebit capellano capelle istud sine omni contradictione recipere et disponere ad ipsius tantum capelle commodum et honorem Si uero idem capellanus contra predictum iuramentum fidelitatis uenerit uel alias deliquerit unde merito debeat suspendi uel a ministerio capelle amoueri si predictus abbas et conuentus Sancte Osithe infra viginti dies postquam a persona matricis ecclesie eis significatum fuerit de predicto excessu ipsum capellanum non amouerint uel suffitienter corripuerint dicta persona ipsum libere amouebit irrequisito dicti abbatis et conuentus consensu non obstante eorum appellatione sine contradictione saluo per omnia iure domini Londoniensis episcopi Predicta uero matrix ecclesia decetero libere percipiet omnes decimas maiores et minores de dominico predictorum abbatis et conuentus sine reclamatione et retentione tam in noualibus quam in aliis non obstante aliquo priuilegio ab eis impetrato uel impetrando Siquid uero contra istam concessionem ab aliquo a quocumque iudice impetratam fuerit uiribus et effectu careat imperpetuum Et ut hec prescripta inuiolabilem habeant firmitatem imperpetuum sigillum uenerabilis patris domini Eustachii Londoniensis episcopi et sigilla predictorum abbatis et conuentus de Waltham et abbatis et conuentus Sancte Osithe una cum sigillo predicti Magistri Ricardi persone de Walda huic scripto in modum cyrograffi confecto et in tres partes diuiso cuius una pars penes dominum episcopum Londoniensem et relique due partes in predictis ecclesiis de Waltham et Sancte Osithe ad maiorem securitatem sunt alternatim reposite sunt apposita Actum est hoc vij kalendas Nouembris anno domini mccxxj pontificatus uenerabilis patris Eustachii Londoniensis episcopi anno primo et cetera

Source Fulltext: Early Charters of Waltham Abbey. Rosalind Ransford. Studies in the History of Medieval Religion, V.2. Boydell Press. Woodbridge, Suffolk, Wolfeboro, N. H., USA. 1989.