e[ustachius] dei gracia Eliensis episcopus omnibus sancte matris ecclesie filiis ad quos presentes littere pervenerint eternam in domino salutem Mandatum domini pape in hec verba suscepimus Innocencius episcopus servus servorum dei venerabili fratri episcopo Eliensi salutem et apostolicam benedictionem Significante dilecto filio Magistro Iohanne de Tinem[] rectore ecclesie de Upmenstre nostris est auribus intimatum quod abbas et canonici de Waltham Londoniensis diocesis decimas quorundam novalium sitorum infra limites ecclesie sue predicte pro sue voluntatis arbitrio detinent et reddere contradicunt in hiis et aliis eidem dampna non modica et iniurias irrogantes Quoniam igitur nobis non constitit fraternitati tue per apostolica scripta mandamus quatinus partibus convocatis et auditis hinc inde propositis quod iustum fuerit appellacione remota decernas faciens quod decreveris per censuram ecclesiasticam firmiter observari Testes autem qui fuerunt nominati si se gracia odio vel timore subtraxerint per censuram eandem appellacione remota compellas veritati testimonium perhibere nullis litteris veritati et iusticiis preiudicantibus a sede apostolica impetratis Dat[] Lateran[] x kalendas Aprilis pontificatus nostri anno septimo Huius auctoritate mandati nobis a Magistro Iohanne de Tinem[] porrecti abbatem et canonicos de Waltham legitime vocavimus constitutis igitur in presencia nostra Magistro Iohanne predicto et procuratore dictorum abbatis et canonicorum idem Iohannes proposuit abbatem de Waltham lx acras terre iuxta terram Rogeri Godehon infra limites parochie de Upmenstre sitas biennio excoluisse et decimas frugum inde provenientes ecclesie sue de Upmenstre iniuste subtraxisse Adiecit quoque quod cum abbas in terris que olim fuerant Roberti Blundi Roberti Palmer[] et Britthi parochianorum ecclesie de Upmenstre sepes quamplures fossas quoque quamplures complanasset et terras in quibus sepes ille et fosse fuerant excoluisset decimas frugum de terris illis provenientes ecclesie de Upmenstre minus rationabiliter reddere contradixit cumque super hiis peteret iusticiam sibi exibere Procurator abbatis et conventus respondit abbatem et conventum ad solucionem predictarum decimarum non teneri allegans eos tutos esse auctoritate privilegiorum apostolicorum quibus eis indultum est ut novalium suorum que propriis manibus vel sumptibus excolunt nullus ab eis decimas exigere vel extorquere presumat set prefatus Iohannes prenominatas terras novalia esse negans privilegiis huiusmodi eos defendi non posse asserebat Lite igitur taliter contestatur Testes utriusque partis recepimus demum cum utriumque produccionem testium esset renunciatam lis inter eos amicabili composicione conquievit sub hac forma videlicet quod abbas et conventus de omnibus terris predictis in quibus sepe et fosse predicte olim fuerant decimas frugum Magistro Iohanni quamdiu viveret cum omni integritate persolvent De lx veto actis terre predictis quas diu ipsi eas propriis manibus vel sumptibus colerent decimas propriis usibus suis retinerent Si veto laici eas excolerent suis sumptibus et ad usus suos laici cultores decimas frugum eidem Iohanni plenarie solverent quamdiu eas excolerent Hec autem ab utraque parte firmiter promissa sunt salvo iure utriusque ecclesie scilicet Sancte Crucis de Waltham et Sancti Laurencii de Upmenstre post decessum dicti Iohannis Hanc autem composicionem in presencia nostra legitime et amicabile factam nos ratam habentes eam auctoritate qua fungimur confirmamus et ut nullus temeritate processu temporis possit dissolvi eam presentis scripti testimonio et sigilli nostri apposicione roboramus Valeat universitas vestra in domino

Source Fulltext: Early Charters of Waltham Abbey. Rosalind Ransford. Studies in the History of Medieval Religion, V.2. Boydell Press. Woodbridge, Suffolk, Wolfeboro, N. H., USA. 1989.