Sciant tam presentes quam futuri hanc esse formam firme pacis inter Abbatem Warinum de Sancto Albano et Abbatem Willelmum de Westmonasterio de controuersia que fuit inter illos de uisu francplegiorum de Aldenham et de secta hundredi uidelicet quod Abbas Sancti Albani Warinus premissa summonitione congrua mittet quem uoluerit de bailiuis suis ad uidendum francplegium in Aldenham ita quod suscepto ab eodem bailiuo abbatis Sancti Albani iuramento hominum de Aldenham et audito uero dicto de his unde requisiti fuerint ipse bailiuus abbatis Sancti Albani uadia ab his qui in misericordia fuerint recipiet et ipsa uadia et omnes forisfacture que illa die de uisu francplegiorum peruenient remanebunt quieta abbati Westmonasterii in manu bailiui sui Per sic quod singulis annis in die uisus francplegiorum bailiuus abbatis Sancti Albani recipiet per manum bailiui abbatis Westmonasterii duos bisantios uel quatuor solidos sterlingorum siue fuerint forisfacture siue non fuerint nec poterit amplius exigi ab abbate Westmonasterii uel bailiuo suo uel hominibus de Aldenham pro uisu francplegiorum salua secta hundredo sicut antiquitus fieri solebat et saluis placitis corone Et ut hec forma pacis stabilis sit et firma sigillorum munimine utriusque partis roboratur His testibus Willelmo de Sisauern senescallo Sancti Albani Laurentio de Theobrug Gaufrido de Childew Waltero Blancfrunt Rollando Blancfront Nicholao dispensatore Roberto de Lenn Edwardo preposito Westmonasterii Thoma pincerna Alano filio Edwardi Ada de Winton Ioseph seruienti Iacobo ostiario Roberto marescallo

Source Fulltext: Westminster Abbey Charters, 1066-c.1214. Emma Mason, Jennifer Bray, Desmond J. Murphy. London Record Society Publications, V.25. London Record Society Publications. London. 1988.