Universis sancte matris ecclesie filiis presens scriptum visuris vel audituris h[ugo] Dei gratia abbas Sancti Eadmundi et a[dam] prior de Ixewrd[] et r[icardus] prior Sancti Eadmundi salutem in Domino Mandatum domini pape in hec verba suscepimus [...] Huius igitur auctoritate mandati partibus ad presentiam nostram convocatis prior et conventus de Eya petebant ab j[ohanne] de Luveyn persona ecclesie de Stradebroc et w[illelmo] thesaurario Eboracensi eiusdem ecclesie vicario decimas frugrum essarti de Stradebroc quod vocatur Bradeleye ratione perceptionis decimarum pasnagii eiusdem essarti antequam ad culturam redigeretur et intendebant petitorium et possessorium Petebant et cetera sibi satisfieri de decimis inde perceptis a quinque annis retrotransactis Econtra j[ohannes] de Luveyn persona de Stradebroc litem contestando resspondit decimas a priore et conventu petitas ad ecclesiam de Stradebroc iure parrochiali pertinere quia sunt infra limites illius parrochie et collationem episcopi nichil iuris eisdem monachis contulisse si forte illas decimas eis confirmaverit quia episcopus non potuit decimas de Stradebroc ad aliam ecclesiam vel monasterium convertere vel conferre Item dicebat quod fundator domus de Eya non est nec fuit patronus ecclesie de Stradebroc et ideo non posse eis decimas illas conferre Item dicebat ecclesiam de Stradebroc percepisse decimas petitas maiores et minutas iam quatraginta annis elapsis Similiter magister Laurentius de Lincoln[] litteratorie constitutus procurator Willelmi Eboracensis thesaurarii resspondit priori et conventui de Eya litem contestando quod non habebant ius petendi decimas de essarto quod vocatur Bradeleye quia tota terra illa est infra limites parrochie de Stradebroc et ita pertinent ad ecclesiam de Stradebroc iure parrochiali Item dicebat quod predicti monachi numquam perceperunt decimas de glande vel nucibus vel fructu aliquarum arborum dum ibi erat boscus et si perceperint iniuste perceperunt quia terra illa est infra parrochiam de Stradebroc Item quod nullas decimas inde perceperunt infra quatraginta annos proximo preteritos Lite igitur coram nobis in iudicio sollempniter et rite contestata admissis testibus quos utraque pars coram nobis producere curavit attestationibus ex more puplicatis et aliis omnibus sollempniter peractis inspectis et cetera diligenter instrumentis tam donatoris predictarum decimarum quam etiam episcoporum diocesanorum ex parte prioris et monachorum exhibitis necnon et confirmationum romanorum pontificum Auditis et cetera et intellectis rationibus et allegationibus utriusque partis diffinitive pronunciavimus decimas a predictis priore et monachis de Eya petitas eisdem esse restituendas et easdem ad eosdem iure proprietatis pertinere Condempnantes w[illelmum] thesaurarium Eboracensem vicarium ecclesie de Stradebroc in duodecim marcis predictis priori et monachis de Eya pro decimis per quinquennium de predicta terra perceptis Et quia dictus prior pro se et conventu suo inspectis sacrosanctis iuravit se in lite quinque marcas et amplius expendisse eosdem j[ohannem] de Luveyn et w[illelmum] thesaurarium Eboracensem eisdem priori et conventui in quinque marcis solvendis nomine expensarum condempnavimus Hec autem sententia lata est a nobis anno ab Incarnatione Domini mcc vicesimo primo in octabis Sancti Johannis Baptiste in ecclesia Omnium Sanctorum de Fornham assidentibus nobis viris discretis et honestis in iureperitis et ut hec sententia a nobis lata robur perpetue firmitatis optineat eam presenti scripto et sigillorum nostrorum appositionibus corroboravimus

Source Fulltext: Eye Priory Cartulary and Charters. Vivien Brown. Suffolk Charters, V.12. Suffolk Records Society. Boydell Press. Woodbridge, Suffolk. 1992.