Anno ab incarnacione domini mccvii cum prior et canonici de Dunestable instanter peterent contra abbatem et monachos de Wardon decimas de terris quas iidem monachi colunt suis sumptibus in parochia de Flittewich et dicti abbas et monachi assererent se racione priuilegiorum suorum ad solucionem dictarum decimarum non teneri talis compositio inter eos de consilio multorum sapientium intercessit Quod dicti abbas et monachi soluent predictis priori et canonicis iiii sol et viii den annuatim ad terminum sancti Michaelis apud Rokeshoc pro bono pacis et per hanc solutionem quieti erunt ab omni solutione decimarum prouenientium de terris quas tunc in dicta parochia possiderunt Uidelicet de una hida terre cum pertinenciis suis in Prestele et una cultura in parochia de Flittewich que iacet inter stratam que ducit a Bedeford in Dunestable et nemus grangie de Melebroc Et preterea quieti erint [de] decimis prouenientibus ex nutrimentis animalium Si autem dicti monachi aliquas terras a tempore compositionis in dicta parochia de Flittewich adquisierint decimas earum plenarie et sine difficultate ecclesie de Flittewich persoluent exceptis noualibus que propriis sumptibus colunt et colent de quibus decimas retinebunt Preterea concessum est ex utraque parte quod compositio illa que primitus facta fuit inter conuentum de Wardon et ecclesiam de Stepingele de duobus solidis annuatim soluendis ad terminum Sancti Michaelis pro decimis prouenientibus de omnibus terris quas habuerunt tempore compositionis in parochia de Stepinkele perpetuum robur obtineat Ut autem hec compositio firma et stabilis perseueret formatum est scriptum super hac compositione in figura cyrographi ita quod parti monachorum appensa sunt sigilla prioris et conuentus de Dunestable et parti canonicorum appensum est sigillum abbatis et monachorum de Wardon et hanc compositionem firmiter obseruandam utraque pars in deo promisit

Source Fulltext: Cartulary of the Priory of Old Wardon, Bedfordshire. G. H. Fowler. John Rylands Library, Manchester, Latin 223. Manchester University Press. Manchester. 1931.