Hec est conuentio facta in curia sancti Edmundi anno ab incarnatione domini vi coram Willelmo de Kretingeham senescallo Ricardo de Gosfeld constabulario Thoma de Mendham Alberico de Capeles Gaifrido de Weluetham Waltero de Weluetham Roberto de Horniggesherth Gileberto de Stagno Adam de Falesham Iohanne Balistario Roberto Foukerand Willelmo de Meleford et aliis fidelibus sancti Edmundi tunc ibi presentibus inter Samsonem abbatem sancti Edmundi et conuentum eiusdem loci et fideles homines suos de Sudwald scilicet quod predicti homines sui assensu et uoluntate promiserunt et sponte concesserunt se singulis annis in perpetuum daturos unum auxilium trium marcarum celerario sancti Edmundi ad opus cappellani qui celebrabit diuina in cappella de Sudwald Scilicet xx solidos die clausi pasche et xx solidos die sancti Martini in hieme ita quod si predicte iij marce non fuerint persolute predictis diebus statutis ante uesperam predicti homines erint in misericordia abbatis et conuentus de lx solidis Statutum etiam est quod quicumque habitant uel habitaturi sunt in predicta uilla de Sudwald rationabilem portionem ad auxilium predictum secundum dispositionem et prouidentiam viii legalium hominum de eadem uilla qui ad hoc eligentur per commune consilium celerarii et hominum de eadem uilla Concessum quoque est quod predicti homines numquam recipient aliquem extraneum ad inhabitandum in eadem uilla nec aliquam portionem terre uendent uel dabunt alicui loco religioso nisi per consensum abbatis et conuentus sancti Edmundi Et ut hec conuentio rata sit et firma presentis cirographi testimonio confirmata est Et ad maiorem securitatem huius conuentionis obseruande predicti homines terras suas et tenementa et catalla sua posuerunt in plegium pro se et heredibus suis tam presentibus quam futuris

Source Fulltext: Kalendar of Abbot Samson of Bury St. Edmunds. R. H. C. Davis. Camden Third Series, V.84. Offices of the Royal Historical Society. London. 1954.