Hec est conuentio facta inter Robertum custodem hospitalis sancti Iohannis extra portam orientalem Oxonie et fratres eiusdem domus ex una parte et Iohannem de Henham et Amitiam uxorem eius relictam Roberti Waldri ex altera scilicet quod predicti Robertus et fratres concesserunt dimiserunt liberauerunt predictis Iohanni et Amitie illud mesuagium cum pertinentiis quod fuit Osberti Fabri quod iacet inter domum que fuit Willelmi de Wintonia et mesuagium quod fuit Matildis de la Wose in parochia sancti Petri uersus portam orientalem Oxonie in strata regia habend et tenend predictis Iohanni et Amitie quamdiu uixerint et qui alter eorum diutius superstes exstiterit dictum mesuagium cum pertinentiis teneat et possideat omnibus diebus suis nec licebit dictis Iohanni et Amitie uel alteri eorum dictum mesuagium uendere uel aliquo alio modo alienare in parte uel in toto Et si contingat quod dicti Iohannes et Amitia uel alter eorum contra istam conuentionem uendendo uel aliquo alio modo alienando uenerit licebit dictis fratribus dictum mesuagium sine contradictione intrare et sicut proprietatem pacifice possidere Dicti uero Iohannes et Amitia soluent dicto hospitali singulis annis sex solidos et decem denarios uidelicet ad duos anni terminos scilicet ad festum sancte Marie in Martio tres solidos et quinque denarios ad festum sancti Michelis tres solidos et quinque denarios ita tamen quod dicti fratres singulis annis reddent Amitie et heredibus suis post decessum suum duos denarios ad duos anni terminos scilicet ad festum sancte Marie in Martio unum denarium et ad festum sancti Michelis unum denarium Si uero contingat quod dictus Iohannes post decessum dicte Amitie uel dicta Amitia post decessum dicti Iohannis aliquo tempore siue in sanitate siue in egritudine dictum hospitale uelit ingredi concessum est a dicto Roberto custode hospitalis et dictis fratribus ut in dicto hospitali quis eorum uidelicet Iohannes et Amitia diutius superstes exstiterit recipiatur et ibidem honorifice et suffitienter secundum facultates domus omnibus diebus uite sue sicut frater et soror sustentetur proprietate tamen sepedicti mesuagii que dictos Iohannem et Amitiam ad terminum uite sue contingebat dicto hospitali renuntiata et sine omni contradictione liberata Si uero dicti Iohannes et Amitia uel alter eorum de sepedicto mesuagio calumpnientur ab aliquo dicti fratres dictum mesuagium ad uitam dictorum Iohannis et Amitie uel alterius eorum ipsis uel alteri eorum contra omnes warantizabunt Concessum est etiam a dicto Roberto capellano custode dicti hospitalis et dictis fratribus dictis Iohanni et Amitie uel alteri eorum qui diutius uixerit quod habeant fornasium de metallo ad bratiandum sine omni calumpnia dictorum custodis et fratrum dicti hospitalis omnibus diebus suis non obstante testamento Roberti Waldri primi mariti dicte Amitie Et etiam dicti fratres pauimentum in strata regia ex opposito dicti mesuagii ad sumptus suos proprios secundum consuetudinem uille facient per hanc nostram conuentionem Et ne hec concessio dimissio et liberatio ad terminum obliuioni tradatur ex utraque parte fideliter obseruandum affidatum est et iuratum Partes etiam alterna signa alternis scriptis apposuere Hiis testibus Galfrido de Stocwelle tunc maiore Oxonie Laurentio Log Iohanne Pille prepositis Philippo Molendinario Henrico Symeon Petro Toraldi Thoma de Submuro Pentecuste Willelmo de Wintonia Andrea Halegod et aliis

Source Fulltext: Cartulary of the Hospital of St. John the Baptist. H. E. Salter. Oxford Historical Society, V.66. Oxfordshire Record Society. Clarendon Press. Oxford. 1914.