Notum sit uniuersis Cristi fidelibus ad quos presens scriptum peruenerit quod cum contencio mota esset inter fratres hospitalis sancti Iohannis extra portam orientalem Oxonie ex una parte et Robertum perpetuum uicarium ecclesie sancti Petri Oxonie ad orientem ex altera super decimis feni secundis de pratis et pratellis in parochia dicte ecclesie prouenientibus et super decimis fructus arborum ortorum et nutrimentorum animalium et super omnibus aliis minutis decimis et oblacionibus fratrum et sororum dicti hospitalis tandem mediantibus magistro Rogero de Weseham archidiacono Oxonie et magistro R de Cadenay tunc domini Lincolniensis episcopi officiali contencio super dictis decimis inter eos mota amicabili composicione conquieuit sub hac forma uidelicet quod dicti fratres soluent plene et integre sine aliqua diminucione prefato R singulis annis decimas de secundo feno suo in parochia dicte ecclesie proueniente sicut consueuerunt soluere de primo feno suo et nichil facient uel fieri procurabunt maliciose uel fraudulenter de pratis suis aut pratellis in dicta parochia aliquando falcatis quominus tempore dicti uicarii decime feni secundi sicut et primi ei annuatim soluantur fideliter Dabunt etiam dicti fratres pro bono pacis annuatim predicto R uicario quamdiu fuerit uicarius dicte ecclesie dimidiam marcam argenti uidelicet ad Pascha xL denarios et ad festum sancti Michaelis quadraginta denarios et idem Robertus uicarius sic remisit dictis fratribus omnem accionem et exaccionem si quam habuit uel habere potuit in decimis et oblacionibus supradictis in tota uita sua saluo iure dicte matricis ecclesie et rectoris eiusdem et successorum dicti uicarii et fratrum et sororum dicti hospitalis Concessit etiam idem uicarius et permisit quantum in se est quod fratres et sorores dicti hospitalis percipient libere sacramentum eucharistie et penitencie et sacramentalia scilicet aquam benedictam et panem benedictum in capella dicti hospitalis Ad obseruacionem uero premissorum tam dicti fratres quam predictus R uicarius se fide media obligauerunt saluis tamen dictis fratribus priuilegiis suis super dictis decimis optentis et obtinendis ita tamen quod dimidiam marcam predicto R uicario soluant dicti fratres annuatim cum predictis fenis quoad fuerit uicarius dicte ecclesie terminis supradictis sicut premissum est Et ad ea fideliter obseruanda subiecerunt se partes iurisdiccioni archidiaconi Oxonie ad compellendum partem illam ad plenam satisfaccionem que uenerit contra composicionem supradictam omni appellacioni et omni iuris remedio tam canonici quam ciuilis renunciando Si uero dicti fratres contra formam huius composicionis fecerint nisi legittime commoniti per prefatum uicarium eidem satisfecerint per dictum archidiaconum ad satisfaciendum compellentur qui scilicet archidiaconus si trina admonicione premissa canonice interpellatus hoc facere neglexerit tunc demum licebit dicto uicario ad iudices suos delegatos Hereford[ie] recurrere ut per eos compellantur dicti fratres nolentes composicionem obseruare ad plenam decimarum solucionem Consenserunt autem partes ut iudices in hac parte plenam habeant cohercionem Acta anno mccxxxvii mens[e] Febr[uarii] feria vi proxima ante cathedram sancti Petri In huius rei testimonium apposita sunt signa iudic[is] archidiaconi partium

Source Fulltext: Cartulary of the Hospital of St. John the Baptist. H. E. Salter. Oxford Historical Society, V.66. Oxfordshire Record Society. Clarendon Press. Oxford. 1914.