Omnibus Christi fidelibus ad quos presens scriptum peruenerit Iohannes de Brandeston frater et heres Willelmi filii Henrici de Brandeston salutem in domino sempiternam Nouerit uniuersitas uestra me concessisse et presenti scripto meo confirmasse donationem concessionem et quietam clamationem quam Willelmus de Brandeton frater meus fecit deo et beate Marie de Luffeld et monachis ibidem deo seruientibus de toto tenemento cum omnibus pertinentiis suis quod de dictis monachis aliquando tenuit in uilla et campis de Silueston uel in mesuagiis terris redditibus escetis et natiuis cum eorum catallis atque sequelis prout in carta que Willelmus de Brandeston frater meus dictis monachis fecit testatur tenend et habend dictum tenementum cum omnibus pertinentiis dictis monachis et eorum successoribus in liberam puram et perpetuam elemosinam adeo libere et quiete ac pure sicut aliqua elemosina melius uel liberius siue purius poterit concedi uel teneri inperpetuum Et ego dictus Iohannes et heredes mei uel mei assignati dictum tenementum cum omnibus pertinentiis dictis monachis et eorum successoribus sicut prenotatum est contra omnes gentes warantizabimus acquietabimus et inperpetuum defendemus Ut autem hec mea concessio et presentis scripti confirmatio rata et stabilis preserueret huic presenti scripto sigillum apposui in testimonium Et quia sigillum meum proprium promtum non habui sigillum Willelmi de Cotis apponi procuraui Hiis testibus domino Roberto de Paueli domino Iohanne de Wedon militibus Elya de Tingewik Ricardo Grusset Ricardo clerico de Sulueston Ricardo de la Wodehall et aliis

Source Fulltext: Luffield Priory Charters. Gerald Ranking Elvey. Northamptonshire Record Society, V.22 P.1. Northamptonshire Record Society. Jordens (Bucks.). Oxford. 1968.