W dei gracia Linc[] episcopus dilectis in Christo filiis decano et capitulo Linc[] ecclesie salutem et dei benediccionem Quia feruens habemus desiderium ut ad honorem dei et beate virginis genitricis eius Marie In ecclesia Linc[] debita celebritate singulis quibus temporibus prout decet diuina celebrentur ad id competenter et comode prosequendum canonicorum et vicariorum ibi residencium utilitati prospicere cupientes tibi decane et canonicis residentibus et si decanus fuerit absens tibi subdecane et canonicis residentiam facientibus hanc potestatem indulgemus vt nostra auctoritate licitum sit vobis cohercere omnes canonicos qui non faciunt residenciam per detencionem prebende sue idoneos vicarios loco suo constituant et de communi consilio canonicorum residencium eis honestam et sufficientem sustentacionem prouideant Preterea vobis hanc etiam facimus indulgenciam ut omnes iniustos detentores commune vestre et omnes qui uel hominibus uel possessionibus ad eandem communam pertinentibus iniuriam molestiam uel grauamen intulerint liberum sit vobis ecclesiastica censura cohercere et in eos usque ad condignam satisfactionem canonicam iusticiam exercere Saluo in omnibus iure episcopi et eius potestate Nec liceat archidiaconis decanis uel aliis officialibus Linc[] episcopatus excommunicatos aut interdictos a uobis absoluere citra mandatum episcopi uel uestrum Precipimus autem ut sentencia que a vobis lata fuerit per archidiaconos uel decanos seu alios episcopatus officiales execucioni mandetur

Source Fulltext: The Registrum Antiquissimum of the Cathedral Church of Lincoln. C. W. Foster. Lincoln Record Society, V.27. Lincoln Record Society. Hereford Times. Hereford. 1931.