Notum sit omnibus sancte ecclesie filiis presentibus et futuris quod ego Rogerus de Mubrai et ego Nigellus filius et heres ejus dedimus et hac nostra carta confirmavimus Deo et ecclesie Sancte Marie de Font[ibus] et monachis et fratribus ibidem Deo servientibus unam viam tante latitudinis quantum necesse fuerit per quam averia sua de Audeburg exire possint ad pascendum ad pasturam suam in mora inter Suintun et Niderdala que mora pertinet ad honorem de Masham Hanc viam habebunt per terram et feudum nostrum ubi eis utilius fuerit extra bladum et pratum sine omni impedimento nostri vel hominum nostrorum Et nos et heredes nostri eandem viam cum predicta pastura eis guarentizabimus imperpetuum sicut puram et perpetuam elemosinam nostram et ab omni terreno servicio liberam Et preterea confirmavimus eis totam terram illam quam Turgisus filius Malgeri et Albrea uxor ejus eis dederunt in territorio de Suint scilicet inter Rumore et Gredgate sicut in carta Turgisi continetur quam monachi inde habent Confirmavimus etiam eis totam terram illam quam Radulfus filius Aldelin et filii ejus Guillelmus et Ricardus eis dederunt in territorio de Aldefeld ita libere et quiete et plenarie sicut in cartis eorum continetur Et sciendum quod predicta via trium percarum latitudinis erit et postquam in predicta pastura pernoctaverint non longius ibunt in predicta pastura quam ut sequenti die redire possint ad carrucam Teste Roberto capellano Roberto de Aievilla Hugone Malebise Radulfo de Belveir Hamone Beler Roberto de Busci Adam Luvel Herberto filio Ricardi Roberto le Norreis Petro clerico Roberto de Novilla

Source Fulltext: Charters of the Honour of Mowbray, 1107-1191. D. E. Greenway. Records of Social and Economic History, New Series 1. British Academy. Oxford University Press. London. 1972.