Dilectis sibi in Domino universis sancte matris ecclesie filiis frater Gilebertus Herfordensis ecclesie minister gaudia pacis et salutis Diffinitionem cause que inter monachos Elyenses et clericum Henricum nomine super manerio de Stevechewrtha diu agitata est et post modum a bone memorie Anastasio papa terminata vestre presenti scripto intimare discretioni curavimus ut antique litis germina veritatis attestatione prorsus eradicemus Contenta itaque lite inter predictos monachos et iam dictum clericum cum post multas appellationes et appellationum prosecutiones in multorum presentia iudicum suis usi sufficienter allegationibus causam pro libito ventillassent omnibus per rescriptum predicto pape Anastasio declaratis causa in hunc modum ab ipso decisa est Monachos in possessionem iam dicti manerii inducendos esse decrevit et nisi infra annum predictus Henricus cautionem sistendi parendique iudicio super eandem causam prestaret idem manerium monachis et ipsorum ecclesie in perpetuum confirmandum esse adiudicavit huiusque ab ipso sic date sententie dompnum Teodbaldum Cantuariensem archiepiscopum et nos executores constituit Apostolico itaque parentes mandato ipsos in possessionem induximus et quia elapso iam anno nichil a parte Henrici super sibi designata cautione audivimus predictum manerium Elyensi ecclesie in perpetuum apostolica auctoritate confirmamus et ut ipsi manerium ipsum ab omni reclamatione Henrici et successorum eius quietum habeant eadem auctoritate precipimus

Source Fulltext: Liber Eliensis. E. O. Blake. Camden Third Series, V.92. Offices of the Royal Historical Society. London. 1962.