Acta in Capitulo vj Nonas Octobris A[nno] D[omini] m ccc quinto Quum Magister Willelmus de Haxeby Canonicus hujus ecclesiae diem suum clausit extremum quod non sine cordis amaritudine referimus cujus testamenti probatio et bonorum administrationis concessio ad nos Capitulum beati Johannis praedicti de jure et de consuetudine nostrae ecclesiae dinoscitur pertinere Nos Auditor causarum Capituli praedicti vice et auctoritate ipsius Capituli ex officii nostri debito omnia bona ipsius Willelmi quatinus ad nos attinet sequestramus et sub ar[c]to sequestro nostro ponimus inviolabiliter custodiri Inhibentes sub poena excommunicationis majoris quam in hiis scriptis proferimus in omnes hujusmodi sequestrum nostrum ausu nephario violantes ne quis de dictis bonis se aliqualiter intromittat vel ad ea manus extendat ipsa bona alienando amovendo vel etiam occultando donec hujusmodi sequestrum ipsum per nos ut praemittitur interpositum in forma juris fuerit relaxatum

Source Fulltext: Memorials of Beverley Minster. The Chapter Act Book of the Collegiate Church of St. John of Beverley, A.D. 1286-1347. A. F. Leach. Surtees Society, V.98. Surtees Society. Andrews & Co. London. 1897.