Acta coram nobis Capitulo Beati Johannis Beverlacensis vj Kalendas Maii A[nno] D[omini] millesimo ccc sexto Dominus Johannes de Stoke presbiter Norwycensis dyoceseos procurator Domini Nicholai nati Domini Johannis de Bauquell militis comparuit coram nobis in Capitulo nostro et litteras Venerabilis patris Domini W[] permissione divina Eboracensis Archiepiscopi nobis praesentavit quarum tenor talis est Willelmus permissione divina Eboracensis Archiepiscopus Angliae primas Dilectis in Christo filiis Capitulo nostro Beverlacensi Salutem gratiam et benedictionem Cum sanctissimus in Christo pater et dominus noster Dominus Clemens papa quintus Nicholao nato nobilis viri Domini Johannis de Bauquell militis canonico Beverlacensi de canonicatu et praebenda ecclesiae Beverlacensis quam duxerit acceptandam gratiam fecerit specialem Nobis litteris apostolicis provisoriis et executoriis ac processu super hoc factis et habitis praesentatis quas coram nobis fecimus recitari quem in persona Johannis de Stowe presbiteri procuratoris sui legitimi ejus nomine recepimus quantum in nobis est in dictae Beverlacensis Ecclesiae Canonicum et in fratrem Vobis mandamus quatinus circa ipsum in hac parte ulterius in hac parte exequamini quod est vestrum Valete Datis apud Widmerpol x Kalendas Maii anno gratiae millesimo ccc sexto et pontificatus nostri primo Quibus lectis dictus procurator ad declarandum potestatem mandati sui per Dominum suum praefatum sibi facti quoddam procuratorium in scriptis interposuit quo lecto et ejusdem copia sub manu publica penes nos retenta idem procurator litteras apostolicas provisorias et executorias et processus super hoc factos et habitos praesentavit quibus coram nobis recitatis et earum copiis penes nos retentis dictum Dominum Nicholaum in persona Johannis de Stowe presbiteri procuratorem suum legitimum habita prius deliberatione recepimus quantum in nobis est in nostrae Beverlacensis ecclesiae canonicum et in fratrem secundum vim formam et effectum litterarum dicti patris et provisionis sibi factae sub expectatione prebendae nulli alii de jure debitae in nostra ecclesia proximo vacaturae Acta fuerunt haec in capitulo praedicto die et anno supradictis Magistris Waltero de Glovernia Henrico de Carleton et Domino Willelmo de Sothill canonicis ipsum Capitulum tunc repraesentantibus praesentibus insuper Dominis Johanne de Risindon tunc Auditor causarum Capituli Roberto de Siglesthorn Bernardo de Kirkeby Thoma de Graingham Willelmo de Normanton et Thoma de Yarewell vicariis in ecclesia Beati Johannis praedicti Magistro Ada de Lindesai notario pupplico Domino Henrico de Glouvernia et multis clericis de secunda forma Sub ea tamen protestatione quod eatenus valeat dicta nostra admissio quatinus vires et effectus gratiae sibi factae se extendunt salvoque jure cujuscunque salvis etiam exceptionibus tam contra dictum Dominum Nicholaum quam gratiam sibi factam per nos vel aliquem alium cujus competit vel competet in hac parte coram quocunque judice competente executore vel executoribus proponendis pro loco et tempore oportunis

Source Fulltext: Memorials of Beverley Minster. The Chapter Act Book of the Collegiate Church of St. John of Beverley, A.D. 1286-1347. A. F. Leach. Surtees Society, V.98. Surtees Society. Andrews & Co. London. 1897.