Christi fidelibus pateat universis me Elyam de Lumby clericum ad petendum colligendum et recipiendum nomine venerabilis Capituli Beati Johannis Beverlacensis fidelium elemosinas eidem Capitulo ac novae fabricae ecclesiae suae pia devotione fidelium datas et dandas assignatas et assignandas in tota provincia Eboracensi et dyocoesi Lincolniensi quaestorem et procuratorem specialiter constitutum teneri et tactis sacrosanctis Evangeliis juramento corporaliter praestito obligari dicto Capitulo in viginti libris sterlingorum pro omnibus proventibus dictis Capitulo et fabricae per annum integrum a die confectionis praesentium collatis et conferendis solvendis eidem Capitulo vel ejus attornato terminis infrascriptis videlicet in festo Purificationis Beatae Mariae Virginis quinque libras in [festo] Ascensionis Dominicae quinque libras in festo Sancti Petri ad Vincula quinque libras et in festo Sancti Martini in hyeme quinque libras Et si contingat me pia fidelium largitione ultra praefatam summam pecuniae quicquid recipere quoquo modo totum quod superfuit facta deductione expensarum mearum videlicet pro me et equo et garcione meo et una roba cum tabardo per idem tempus aliarum expensarum occasione dicti officii faciendarum in fine anni praedicti dicto Capitulo absque fraude aliquali liberabo ac eidem Capitulo de omnibus receptis per idem tempus fideliter in meo compoto respondebo Ita tamen quod si ad praefatam summam pecuniae deductis expensis praemissis de proventibus attingere nequiero praetaxatis quantum deficere contigerit de ipsa summa tantum insuper meo compoto allocetur et remittatur Ad quam quidem solutionem fideliter faciendam et ad praemissa omnia observanda obligo me et omnia bona mea mobilia ac immobilia ad manus cujuscunque devenerint heredes meos et executores Et si contingat quod absit in solutione dictae pecuniae seu in aliis quae promisi deficere quoquo modo volo et concedo quod idem Capitulum me heredes meos et executores meos ad omnia et singula supradicta facienda et observanda per quamcumque censuram ecclesiasticam possit compellere strepitu judiciali penitus praetermisso denuntio insuper omnibus exceptionibus appellationibus regiis prohibitionibus et aliis juris remediis quibuscunque mihi competentibus vel etiam competituris per quae executio contra me heredes meos vel executores ob praemissa possit aliqualiter impediri seu ipsius pecuniae solutio aliqualiter retardari In cujus rei testimonium sigillum meum praesentibus est appensum Datis Beverlaci xv Kalendas Januarii anno gratiae m ccc octavo

Source Fulltext: Memorials of Beverley Minster. The Chapter Act Book of the Collegiate Church of St. John of Beverley, A.D. 1286-1347. A. F. Leach. Surtees Society, V.98. Surtees Society. Andrews & Co. London. 1897.