Notum sit omnibus hoc presens scriptum visuris vel audituris quod cum placitum motum esset et discordia inter abbatem et conventum Cirencestr[] ex parte una et Johannem Payn de Baudinton[] ex altera super quadam bunda inter clausum ipsorum abbatis et conventus et clausum predicti Johannis de Baud[] tandem in festo Purificacionis beate Marie anno regni regis Edwardi xxix per visum legalium virorum de convicinio predicte ville de Baudynton[] ex consensu partium electorum consideratum est et decretum predictam bundam et murum eiusdem finaliter levatum usque cursum aque inter clausum predictorum abbatis et conventus et clausum Johannis prenominati ad tenementum predictorum abbatis et conventus totaliter pertinere Quare predictus Johannes Payn pro se et heredibus suis et suis assignatis quibuscumque totum Jus et clamium quod in predicta bunda vel in aliqua sua parte cum muro predicto vendicabat seu in eadem se habere estimabat et asserebat predictis abbati et conventui et eorum successoribus remittit et quietumclamat et omni clamio renunciat imperpetuum ita quod predictus Johannes nec heredes sui assignati eiusdem quicumque aliquid juris seu clamii in predicta bunda exigere poterunt in futurum set imperpetuum exclusi sint ab eadem In cuius rei testimonium predictus j[ohannes] huic presenti scripto sigillum suum apposuit Hiis testibus Roberto de Peniton[] domino de Baudinton[] magistro Jordano de Baud[] Roberto de Stratton[] Roberto de Cruddewell[] et cetera

Source Fulltext: The Cartulary of Cirencester Abbey, Gloucestershire. C. D. Ross. Oxford University Press. London. 1964.