Haec est conventio facta in crastino translationis Sancti Thomae Martyris anno regni regis Henrici filii regis Johannis quinquagesimo quinto inter religiosos viros abbatem et conventum Sancti Petri Gloucestriae ex parte una et abbatem et conventum Oseneye ex altera videlicet cum esset contentio inter dictos religiosos super quadam pastura quae vocatur Haylinge in villa de Aldesworthe dicti abbas et conventus Sancti Petri Gloucestriae communibus amicis intervenientibus praefatis abbati et conventui de Oseneye gratiose concesserunt ut habeant in praedicta pastura sex boves de grangia sua de Aldesworthe a festo Pentechostes usque ad festum Sancti Michaelis quandocunque iidem abbas et conventus Gloucestriae infra dictum tempus averia sua in eadem pastura apposuerunt Nec licebit dictis abbati et conventui de Oseneye praedictos boves suos in praefata pastura aliquando ponere vel ibidem retinere nisi cum abbas Gloucestriae ibidem averia posuerit et tenuerit Concesserunt etiam dicti abbas et conventus Gloucestriae praenominatis abbati et conventui de Oseneya quod habeant xii averia bovini sexus libere in praedicta pastura a festo Sancti Michaelis usque ad Pentechostem sicut liberi homines ejusdem villae de Aldesworthe habere consueverunt Praenominatus vero abbas et conventus de Oseneye pro se et successoribus suis concesserunt quod praedictam conventionem ratam firmam et stabilem habebunt in perpetuum et de eadem sine aliqua augmentatione erunt contenti et in nullo contra eandem venient inperpetuum Et ut haec conventio perpetuitatis robur optineat praelocuti religiosi praesenti scripto sigilla capituli sui alternatim apposuerunt

Source Fulltext: Historia et Cartularium Monasterii Sancti Petri Gloucestriae. William Henry Hart. Rerum Britannicarum Medii Aevi Scriptores, 33 P.1. Longman, Green. Longman, Roberts and Green. London. 1863.