Anno Incarnationis Dominicae millesimo ducentesimo octogesimo quarto kalendas Julii in itinere justiciariorum apud Somertone videlicet dominorum Salomonis de Roffensi Roberti Fulconis Ricardi de Boylunde et Willelmi Brayboef et anno regni regis domini Eadwardi regis octavo Cum inter religiosos viros abbatem et conventum Sancti Petri Gloucestriae ex parte una et dominum Johannem Treygoz militem ex altera super ecclesia Sancti Andreae de Burenham fuisset lis suborta haec est conventio facta inter partes praedictas ad sopiendam litem praefatam videlicet quod dictus dominus Johannes recognovit tunc ibidem coram justiciariis memoratis advocationem praedictae ecclesiae de Burneham esse jus praedictorum abbatis [et conventus] Gloucestriae et advocationem seu jus patronatus ipsius ecclesiae de Burenham necnon et jus siquod habuit vel habere potuit in advocatione ecclesiae de Sancta Keyna Herefordensis dyoecesis et ipsam advocationem relaxavit remisit confirmavit et quietam clamavit pro se et haeredibus suis in perpetuum praemissis abbati et conventui ecclesiae Sancti Petri Gloucestriae Ita quod memorati abbas et conventus libere valeant ad easdem ecclesias quotiens vacaverint idoneas personas pro suo libito praesentare vel ipsas ecclesias si poterint in proprios usus adquirant absque aliquo impedimento ipsius domini Johannis seu aliquorum haeredum suorum Pro hac autem recognitione sua remissione confirmatione et quieta clamatione dederunt et concesserunt supradicti abbas et conventus ad instantiam et rogatum praefati domini Johannis priori et monachis suis de Ewyas ecclesiam de Foy quam habent in proprios usus ad perpetuam firmam ita quod iidem prior et monachi sustinebunt omnia onera ordinaria et extraordinaria ipsius ecclesiae solventes inde annuatim monasterio Sancti Petri Gloucestriae centum solidos libere et integre videlicet in festo Purificationis Beatae [mariae] Virginis et in festo Nativitatis Beati Johannis Baptistae pro aequalibus portionibus pro fructibus ipsius ecclesiae quos dicti abbas et conventus percipere consueverunt Ad haec iidem abbas et conventus remiserunt concesserunt et quietum clamaverunt pro se et successoribus suis eidem domino Johanni et haeredibus suis advocationem ecclesiae de Lydiard dyoecesis Sarum et totum jus quod habuerunt vel habere potuerunt in eadem ex donatione antecessorum ipsius domini Johannis Ita quod liceat eidem domino Johanni et haeredibus suis ad eandem praesentare quotiens vacaverit pro suo libito absque aliquo impedimento dictorum abbatis et conventus vel successorum suorum [in cujus rei testimonium et ad perpetuam rei memoriam huic instrumento in modum cirographi confecto partes alternatim apposuerunt sua sigilla Hiis testibus praesentibus dominis Rogero la Warre Elia Cotele et aliis]

Source Fulltext: Historia et Cartularium Monasterii Sancti Petri Gloucestriae. William Henry Hart. Rerum Britannicarum Medii Aevi Scriptores, 33 P.1. Longman, Green. Longman, Roberts and Green. London. 1863.