Haec est finalis concordia facta in curia domini regis apud Westmonasterium in octabis Purificationis Beatae Mariae anno regni regis Henrici filii regis Johannis none coram Martino de Pateshulle Thoma de Multone Thoma de Haydone Roberto de Lexindene Galfrido le Sauvage justiciariis et aliis domini regis fidelibus tunc ibi praesentibus inter Thomam abbatem Gloucestriae petentem per Henricum le Bel positum loco suo ad lucrandum vel perdendum et Robertum filium Roberti de Horcote quem Ysabella de Horcote vocavit ad warantum et qui ei warantizavit tenentem de una virgata terrae et uno molendino cum pertinentiis in Horcote unde placitum fuit inter eos in eadem curia scilicet quod praedictus Robertus recognovit praedictam terram et molendinum cum pertinentiis esse jus ipsius abbatis et ecclesiae suae de Gloecestria et pro hac recognitione fine et concordia idem abbas concessit eidem Roberto et haeredibus suis totam praedictam terram et molendinum cum pertinentiis tenend et habend de praedicto abbate et successoribus suis in perpetuum Reddendo inde annuatim duas marcas argenti ad quatuor terminos scilicet in vigilia Paschae dimidiam marcam in vigilia Sancti Johannis Baptistae dimidiam marcam in vigilia Sancti Michaelis dimidiam marcam in vigilia Natalis Domini dimidiam marcam pro omni servitio etc

Source Fulltext: Historia et Cartularium Monasterii Sancti Petri Gloucestriae. William Henry Hart. Rerum Britannicarum Medii Aevi Scriptores, 33 P.1. Longman, Green. Longman, Roberts and Green. London. 1863.