Assisa venit recognoscere utrum quadraginta pedes pasturae ex una parte pontis Gloucestriae et quadraginta pedes ex altera sint libera elemosina pertinens ad ecclesiam Sancti Nicholai Gloucestriae unde Willelmus Cucuel est persona vel laicum feodum abbati Sancti Petri Gloucestriae pertinens et abbas per attornatum venit et nihil dicit quare assisa remaneat sed ponitur in respectum quia omnes juratores amovit Sed Willelmus dicit quod custodia pontis Gloucestriae pertinet ad ecclesiam suam et pastura pertinet ad pontem et hac ratione clamat ipse eandem pasturam Et abbas per attornatum suum dicit quod pastura illa pertinet ad manerium suum de Mayesmore quod tenet ex dono regis Henrici senioris et inde profert cartam ejusdem regis quae testatur quod ipse dedit Deo et ecclesiae Sancti Petri et Serloni abbati Gloucestriae ad victum monachorum terram de Mayesmore et silvam totam et planum similiter sicut ipse rex melius illam habuit et inde ponit se super juratam quod pastura illa est de pertinentiis de Mayesmore Et ideo procedit assisa Juratores dicunt quod pastura illa est laicum feodum abbatis et non elemosina Et ideo consideratum est quod abbas eat quietus et Willelmus in misericordia pro falso clamio Acta sunt haec anno Domini millesimo ducentesimo vicesimo primo coram justiciariis itinerantibus abbatibus de Radinge et de Evesham Martino de Pateshulle Radulpho Harang Roberto de Lexendene Johanne de Monemue apud Gloucestriam decimo septimo kalendas Augusti Eodem anno et die lecta est carta Willelmi de Pundelarge de cursu fontis qui dicitur Bersewelle ipso Willelmo praesente et consentiente et postea inrotulata est in rotulis eorundem justiciariorum

Source Fulltext: Historia et Cartularium Monasterii Sancti Petri Gloucestriae. William Henry Hart. Rerum Britannicarum Medii Aevi Scriptores, 33 P.1. Longman, Green. Longman, Roberts and Green. London. 1863.