Uniuersis sancte matris ecclesie filiis presens scriptum inspecturis Ricardus permissione diuina ecclesie Westmon[] minister humilis et eiusdem loci conuentus Willelmus humilis prior Wigorn[] ecclesie et eiusdem loci conuentus salutem in domino sempiternam Quoniam ex mutuo fraterne confederationis uinculo karitas dilatatur et ecclesiarum societas roboratur communi consilio placuit et assensu nos et ecclesias nostras inuicem speciali societatis uinculo federari eoque libentius et iustius sancius et sincerius quo sancti patroni nostri dilectione amplexati sese fuerunt speciali quos in ecclesia militanti florere constat miraculorum uenustate et in ecclesia triumphanti constat gloria et honore coronari Ut ergo mutuum consilium et auxilium ex presentis confederationis uinculo utrique ecclesie possit inposterum prouenire duximus inter nos taliter statuendum Videlicet quod communia sint nostra capitula Unus idemque per omnia sit conuentus omni diuersitate tam corporali quam spirituali seposita penitus et remota a qua communione capituli Wig[] ecclesie monachos Maioris Maluernie ad abbatem et conuentum Westm[] pertinentes duximus excipiendos Abbate uero Westm[] sublato de medio fiet pro eo seruicium in conuentu sicut pro episcopo Wigorn[] ecclesie Priore uero Wigorn[] decedente fiet pro eo in conuentu seruicium sicut pro abbate Westm[] Hoc specialiter obseruato quod audito obitu utriusque habebit tam abbas quam prior in refectorio corredium annuale pro animabus eorum pauperibus erogandum Si quis vero ex uno conuentu ad alium directus fuerit ad manendum domestico suscipiatur affectu et regulariter pertractetur donec recesserit ordinate uel ad pacem ecclesie sue consignetur Pro uno quoque etiam monacho collegii utriusque cum decesserit plenum tricennarium persoluetur a fratribus inferioris ordinis suis quinquagenis specialiter decantandis Nomina quoque monachorum hinc inde decedentium in martirologio conscribentur singulis annis die anniuersariorum suorum recitanda pro quibus in capitulo absolutis in conuentu subsequitur seruicium speciale Ut autem hec nostra constitutio ab utroque capitulo approbata et accepta robur in posterum obtineat firmitatis presenti scripto conuentus uterque signa capitulorum suorum apponentes presentem constitutionem in nomine domini confirmarunt

Source Fulltext: The Cartulary of Worcester Cathedral Priory. R. R. Darlington. Pipe Roll Society, V.76, New Series V.38. Pipe Roll Society. J. W. Ruddock. London. 1968.