Notum sit omnibus ad quos praesens scriptum pervenerit quod cum auctoritate literarum domini papae Honorii tertii lis esset mota coram magistris s[imone] decano Cicestrensi et R de Lavinton decano et W de Kemeseyam canonico Cicestrensi inter magistrum w[illelmum] de Merton canonicum Sarum personam ecclesiae de Farendon petentem ab abbate et monachis de Stanleya nomine praebendae suae Sarum ecclesiae scilicet de Farendon omnes decimas de dominicis quas dicti monachi habent infra limites parochiae de Farendon et praefatos abbatem et conventum asserentes se immunes esse a praestatione dictarum decimarum per privilegia a sede apostolica eis indulta tandem lite inter eosdem contestata provisis etiam attestationibus et habita super eisdem disputatione super praedictis inter ipsos amicabilis intervenit compositio talis videlicet quod dicti abbas et conventus de Stanleya dabunt singulis annis personae ecclesiae de Farendon qui pro tempore fuerit pro bono perpetuae pacis inter ecclesiam Sarum et ecclesiam de Farendon et monasterium de Stanleye reformandae nomine decimarum a dicto magistro Willelmo coram decano Cicestrensi et con judicibus suis praedictis petitarum scilicet decimarum tam majorum quam minorum quas dicti monachi habuerunt tempore compositione istius in parochia de Farendon scilicet terrarum pratorum pascuorum necnon et nutrimentorum animalium suorum vel aliarum decimarum quas aliqua ratione vel jure parochiali peti potuerunt ab eisdem centum solidos sterlingorum annuos scilicet ad festum S Johannis Baptistae quinquaginta solidos et ad Nativitatem [domini] quinquaginta solidos apud Farendon solvendos personae ecclesiae de Farendon vel ejus procuratori vel ipsis absentibus super altare ecclesiae de Farendon sacerdotibus ipsius ecclesiae et aliis adhibitis testibus Ita quod si de caetero aliquae terrae sive rusticorum sive libere tenentium infra limites parochiae de Farendon ad manus praedictorum monachorum devolvantur ex iis integre et sine diminutione decimas persolvent ecclesiae de Farendon ipsam ecclesiam indemnem conservaturi nullo privilegio ad firmarios vel feodatarios eorundem aliquo tempore extendendo Ita tamen quod si dicti monachi ad firmam vel feodum terras sua dederint vel rusticis excolendas interim ecclesia de Farendon integre percipiet decimas de terris ad firmam vel feodum vel rusticis ad excolendum datis et non solvent praedicti monachi interim praedictos centum solidos annuos et si iterum redierit firma vel feodum vel terrae rusticis excultae ad manus monachorum praetaxato modo centum solidos annuos ecclesiae de Farendon persolvent pro hacplena immunitate decimarum ut dictum est eis servata Praeterea si contingat quod abbas et conventus de Stanley aliquas particulas terrarum suarum quas habuerunt tempore compositionis istius in parochia de Farendon rusticis et aliis concesserint praedicto modo excolendas interim monachi praedictos centum solidos persolvent et ecclesia de Farendon de illis terris nihilominus decimas integre percipiet Quod si in eorum redierint dominicum ab omni decimarum praestatione monachi remanebunt ut dictum est immunes Ad haec si pensio centum solidorum praedicta suis terminis non fuerit soluta vel si compositio praedicta ab alterutra partium in aliquo infringatur decanus et canonici in ecclesia Sarum residentes vice totius capituli et decanus Cicestrensis qui pro tempore fuerint habeant sibi plenam concessam potestatem ad compellendum monitione praemissa partem renitentem ad observationem praedictorum remota appellatione et non obstantibus privilegiis monachorum quantum ad hoc pertinet Similem etiam habeant coercionem ad compellendum partem renitentem ad refusionem expensarum per injuriam vel culpam partis renitentis factarum Si tamen inveniantur terrae opportunae pretio centum marcarum de unanimi consilio assensu et voluntate episcopi et capituli Sarum et personae ecclesiae de Farendon qui pro tempore fuerit necnon et monachorum de Stanley comparandae cum terrae pecunia eorundem monachorum sic comparatae fuerint et in earundem plena et pacifica posessione fuerit ecclesia de Farendon in recompensationem centum solidorum assignatorum praedictorum si hoc magis elegerint monachi de Stanlege et honeste fieri possit licebit monachis praedictis ex tunc a solutione memoratorum centum solidorum cessare compositione praedicta in aliis articulis firma et immobili secundum quod supra scriptum est manente Hanc autem praescriptam compositionem inviolabiliter se observaturos fideliter promiserunt praedicti abbas et conventus de Stanlege et dictus magister Willelmus de Merton et ad abundantiorem ejusdem compositionis firmitatem tribus instrumentis super ista compositione confectis sub eisdem verbis et tenore omnino eodem in signum sui consensus et ad eam confirmandam sigilla sua apposuerunt venerabilis pater Ricardus Sarum episcopus et capitulum et judices praefati item abbas et conventus de Stanleye et praefatus magister W de Merton Unum autem praedictorum trium instrumentorum remanebit penes ecclesiam Sarum aliud penes monasterium de []stanleye tertiam penes ecclesiam de Farendon Acta anno gratiae mccxxi Id Aprilis Testibus Ricardo Sarum episcopo Willelmo [de Wanda] decano Roberto [de Hertford] cancellario Abraham thesaurario et aliis

Source Fulltext: Charters and Documents Illustrating the Cathedral, City and Diocese of Salisbury. Dunn McCray. Rerum Britannicarum Medii Aevi Scriptores, 97. H.M.S.O. Eyre and Spottiswoode. London. 1891.