Noverint omnes ad quod praesens scriptum pervenerit quod cum mota esset lis inter Stephanum rectorem ecclesiae de Brichtwalton ex una parte et abbatem et conventum de Bello ex alia super decimis assarti del Holm quod factum fuit tempore hujus compositionis et super decimis exituum centum ovium quas Hardingus quondam habuit in pastura abbatis apud Brichtwalton et super oblationibus messuagii ejusdem Hardingi et pane benedicto et candela et denariis sancti Petri et super decimis feni columbarii casei lanae pullanorum et vitulorum de dominico abbatis in eadem villa coram decano et praecentore et cancellario Sarum judicibus a domino papa delegatis tandem lis mota hoc fine conquievit videlicet quod abbas et conventus dederunt et concesserant dicto Stephano et successoribus suis in perpetuum xvi acras terrae croftam quae appellatur Gilibertesbrech et quatuor acras in bosco de Hemele nomine ecclesiae in perpetuum possidendas simul cum pastura xx ovium cum ovibus abbatis et pasturam centum ovium quas prius habebat ubique cum ovibus abbatis immunes autem erunt dicti abbas et conventus a praestatione dictarum decimarum petitarum Et ut haec praedicta concessio rata sit et stabilis perseveret confecta sunt tria instrumenta concepta sub hoc eodem tenore quorum unum remanebit penes abbatem et conventum aliud penes rectorem ecclesiae de Brichtwaltone qui pro tempore fuerit tertium in thesauraria Sarum quibus omnibus ad majorem securitatem appensa sunt sigillis tam domini Sarum quam judicum delegatorum ac Willelmi de Merton archidiaconi Berksyriaa et partium anno gratiae m cc xxiv apud Radinge in vigilia apostolorum Petri et Pauli

Source Fulltext: Charters and Documents Illustrating the Cathedral, City and Diocese of Salisbury. Dunn McCray. Rerum Britannicarum Medii Aevi Scriptores, 97. H.M.S.O. Eyre and Spottiswoode. London. 1891.