Omnibus Christi fidelibus ad quos praesens scriptum pervenerit Ricardus divina permissione Sarum ecclesiae minister humilis salutem aeternam in Domino Noverit universitas vestra quod cum vacaret praebenda Veteris Sarum decedente dilecto filio nostro Hugone de Templo canonico Sarum cujus animae propitietur Altissimus nos de communi assensu domini w[illelmi de Wanda] decani et capituli Sarum propter pacem et tranquillitatem ejusdem ecclesiae in perpetuum confirmandam de dicta praebenda ita ordinasse videlicet quod retinuimus nobis et successoribus nostris omnem jurisdictionem quam [habere] solebant decanus et canonicus praedictae praebendae tam in praebenda quam in civitate salva libertate clausi et jurisdictione hominum de Stratford qui olim pertinebant ad praebendam de Graham et hominum decani de Stratford Decani quas dicto decano et successoribus suis concessimus ita quod praedicta jurisdictio praebendae et civitatis per nos et successores nostros alii quam archidiacono vel officiali nostro vel alicui vicario in vicaria dictae praebendae constituendo committatur Retinuimus etiam de communi consensu tam capituli quam nostro ad opus nostrum et successorum nostrorum totum dominicum praefatae praebendae et tenentes cum eorum tenementis et cum mansis in civitate ad praebendam pertinentibus et pratis et portionibus ad eandem pertinentibus decano autem et capitulo Sarum omnes domos quas inhabitabat dictus canonicus cum horreis et area in qua sitae sunt dictae domus assignavimus in perpetuum possidendas decimas etiam omnium garbarum et feni totius praedictae praebendae caritative communae Sarum ecclesiae contulimus Et in hujus rei testimonium praesenti scripto sigillum nostrum apposuimus

Source Fulltext: Charters and Documents Illustrating the Cathedral, City and Diocese of Salisbury. Dunn McCray. Rerum Britannicarum Medii Aevi Scriptores, 97. H.M.S.O. Eyre and Spottiswoode. London. 1891.